ارتفاع درجات الحرارة الفترة اللي فاتت والفترة اللي جايه، أكيد ليه تأثير مضر على البني آدمين والحيونات كمان، وخلاص أغسطس على الأبواب، وده معناه إن درجات الحرارة هتبقى في الطالع.. طاب والعمل إيه؟!

احنا كبني آدمين لينا طرق كتير نحمي بيها نفسنا من حرارة الجو والشمس، ومنها مثلاً شرب العصاير الباردة، أو نضرب آيس كريم، وأكيد ده أفضل خيار بنحبه.. لكن لو عندك حيوان أليف أو بمعنى أدق "كلب".. هتتصرف معاه ازاي في الحر ده؟؟ أكيد مش هتحميه كل شوية؟! وأكيد كمان هتدور له على أكلات تنعشه وتفرفشه، وهنا كلمة السر.. إيه رأيك لو كلبك كل آيس كريم!! آه والله زي ما بقولك كده.

"ريتا فريش فود" عبارة عن مكان متخصص في تصنيع وابتكار أطعمة صحية للحيوانات الأليفة، وخصوصًا الكلاب، الأطعمة دي مليانة فيتامينات وبروتينات، وبيستخدموا في تصنيعها لحوم طازة، وفراخ وخضروات وكلها محلية.

النهارده احنا في "كلام القاهرة" عرفنا إن "ريتا فريش فود" بيقدموا "آيس ريتا" وهو الإسم الحركي للآيس كريم الصحي الجديد والمخصص للكلاب، والأول من نوعه في مصر، واللي بيتكون من مكونات صحية زي الفراولة والموز واللبن والزبادي والشوفان والبيض، وهيتقدم بسعر 6 جنيه للكوباية.

 أول ظهور لـ "آيس ريتا"  كان في ايفينت Dog Walk في الشيخ زايد و6 أكتوبر.. ولما تواصالنا مع "ريتا فريش فود" عرفنا إنه هيكون متوفر في مجموعة كبيرة من محلات الحيوانات الأليفة، وفي أماكن مختلفة في القاهرة، علشان يوصل لأكبر قدر ممكن من أصحاب الكلاب، اللي عايزين يدلعوا كلابهم.

"آيس ريتا" هيكون متوفر في محلات "أليف" في 6 أكتوبر والشيخ زايد، و"رويال أنيمالز" في رحاب ومدينتي، و"تندي بيت شوب" في الدقي، و "7 بيتس" في التجمع الخامس والقطامية، و"سي شل" في الساحل.

أما سكان محافظة الجيزة، فممكن تلاقوا "آيس ريتا" في عيادات الدكتور "عمر صفطاوي" في المهندسين و" 4 بيتس"  في الهرم.

لو حابين تعرفو أكتر عن "ريتا فريش فوود" وتتواصلوا معاهم.. ممكن تدخلوا على صفحتهم على الفيس بوك من هنا.