بسبب مشاكل كبيرة في الرؤية بيعاني منها، قرر المحامي المصري "عبد الباسط عزب" إنه يفتح مطعم بيقدم تجربة أكل فريدة للناس، من خلال الأكل في الضلمة. وكمان يعلم المكفوفين فن الطهي، علشان يقدروا يعتمدوا على نفسهم.

المحامي عبد الباسط عزب - الصورة من الوطن

وحسب ما نشر "سكاي نيوز"، دخل عزب في شراكة مع العلامة التجارية "dans le noir"، وعمل تجربة "المطعم المظلم". اللي فكرته قائمة على تقديم الطعام للزبائن في الظلام الدامس. وفريق العمل اللي شغال فيه من المكفوفين وضعاف البصر. هدف التجربة هو تعزيز حواس الفرد زي الشم والسمع والتذوق، من خلال التعامل في أجواء اللي فقد بصره.

بتبدأ التجربة بدخول الزبائن لغرفة مظلمة، وفي واحدة من الاستاف بتمسك إيدهم وتوديهم للترابيزة بتاعتهم. بما إنها بتكون من المكفوفين، فهي عارفة أماكن التاربيزات وإزاي تمشي بينهم. وحسب ما قالت "سميرة سعيد"، واحدة من الفريق، إن الزبون لما بيدخل بيكون مش عارف مكانه. وبكده هو بقى في العالم بتاعي وأنا اللي أقدر أساعده.

تحية كبيرة للمحامي عبد الباسط عزب، اللي عمل تجربة سمحت للكفيف يقدم المساعدة للمبصر.