من وقت انتشار كورونا وتطبيق الحجر الصحي، انتشرت معاه تريندات كتيرة ومختلفة. شوفنا ناس بتعزف وتغني من الشبابيك والبلكونات، وشوفنا التيك توك والمواهب اللي عليه. لكن اليومين اللي فاتوا ظهر تريند عالمي جديد على إنستجرام، وهو "pillow challenge" أو "تحدي المخدة".

فكرة التحدي ببساطة هي إن كل بنت بتحط مخدة قدامها، وتربطها من عند الوسط بحزام. فتبان كأنها لابسة فستان. طبعًا القعدة في البيت مع الأكل الكتير بتزود الوزن. والتحدي عبارة عن اختبار بسيط للوزن، من غير الوقوف على ميزان. فكل ما كان وسط البنت أرفع، كل ما كان شكلها في الفستان أجمل. 

التحدي انتشر بشكل كبير بين البنات، وكمان شارك فيه عدد من الأطفال. ومازال مستمر ولسه مشاركين كتير بينزلوا صورهم على هاشتاج "pillowchallenge" على إنستجرام. 

وبعد ما شوفتوا الصور.. ياترى عندكوا الجرأة تجربوا التحدي؟ ولا صواني البشاميل ليها رأي تاني؟