عادي جدًا إنك تسمع عن بيوتي سنتر جديد، فتح هنا أو هناك. وكالعادة هيقدم الخدمات المعروفة زي المانيكير والباديكير، والذي منه. لكن لما تعرف إن البيوتي سنتر ده للكلاب، هنا لازم نعمل وقفة. 

بسبب عشقه للحيوانات الأليفة، قرر محمد الكاشف (27 سنة) إنه يهتم بيهم. وعمل أول بيوتي سنتر في مصر خاص بالكلاب والقطط. لأنهم زي ما بيحتاجوا رعاية واهتمام، بيحتاجوا برضو شوية دلع.

"كلام القاهرة" تواصل مع الكاشف، وعرف منه إن "Kashef Pets Grooming & Spa" الموجود في الإسكندرية، مش بس بيعمل شاور للكلاب والقطط، ده كمان بيستخدم طرق مختلفة في تسريح شعرهم. وتصميم القصات المطلوبة بأدوات متخصصة. ده غير قص الظوافر وبردها، والألطف إنه بيعمل لهم مانيكير وباديكير.

عرفنا كمان من الكاشف، إن المركز بيوفر معطر للفم، علشان الحيوان الأليف يكون فمه منتعش طول الوقت. وبيعمل جلسات مساج وتدليك، بيستخدموا فيها زيوت عطرية. تخلي ريحة الحيوانات أحسن على طول. وكمان بتحسن لهم الدورة الدموية وتفك عضلاتهم.

طبعًا الموضوع ماخليش من التريقة والتحفيل، وواجه الكاشف في البداية رفض لفكرته من كزا حد. لكنه صمم عليها ونفذها، وبالفعل الفكرة لقت إعجاب ناس كتير. وبقى صاحب البيوتي سنتر الأول والوحيد للكلاب، في مصر.

تقدروا تعرفوا تفاصيل أكتر عن الخدمات اللي بيقدمها البيوتي سنتر من هنا.