ناس كتير زهقت من لبس الكمامة طول الوقت من بعد جائحة فيروس كورونا المستجد، لكن المثير للدهشة إنه فيه دراسة علمية حديثة بتقول إن الكمامة ليها فوائد تاني غير صحية، فوائد عاطفية! اللي أنت قرأته صح، الكمامة أو "الماسك" طلع ليها فوائد تانية خالص مش واخدين بالنا منها، غير كونها من أهم الإجراءات الاحترازية للحماية من العدوى، وهي إنها بتخلينا جذابين وسكسي أكتر للجنس الآخر. معقول؟!
آه ياسيدي.. فيه دراسة حديثة خرجت من جامعة "كارديف"، بتقول إن الكمامات بتخلي الرجالة والستات أكثر جاذبية للعين، مش بس كده دول لقوا إن الأشخاص اللي بيلبسوا كمامة طبية -اللي لونها أزرق- ملفتين للانتباه أكثر من اللي بيستخدموا الكمامة القماش. رغم تصميماتها ورسوماتها المختلفة.
وفسر دكتور "مايكل لويس" من كلية علم النفس بالجامعة، الموضوع ده وقسمه لسببين؛ الأول إن الكمامة ماكنتش جذابة خالص قبل الوباء، ودايمًا كنا بنربطها بالأشخاص اللي بيشتغلوا في مجال الرعاية الصحية، بس دلوقتي بنشعر بالإطمئنان والأمان تجاه أي شخص لابسها. أما السب الثاني فهو إنها بتجذب الانتباه ناحية العيون، وهنا بتبرز جمالها بشكل كبير.
