طول الوقت، بيفاجأنا مارك زوكربيرج، مؤسس فيسبوك، بتحديثات جديدة في تطبيقاته، لكن المرة دي إحنا قدام منتج جديد من نوعه، هياخد التواصل الاجتماعي في حتة تانية خالص، وده بعد إطلاق شركة فيسبوك أول نظارة ذكية، بتسمح للمستخدمين بالتقاط مقاطع فيديو وصور، بضغطة واحدة أو بالأوامر الصوتية.

والنظارة الجديدة اسمها "Ray-Ban Stories"، لإنها تعاون مشترك بين "فيسبوك" و شركة النظارات العالمية "راي بان"، وبتحتوي على كاميرتين بدقة 5 ميجا بيكسل، مع مؤشر LED، بيضيء وقت عمل الكاميرات، والهدف منه إن الأشخاص الآخرين، يعرفوا إن مستخدم النظارة بيقوم بالتقاط صورة أو فيديو.

ممكن تتحكم في خواص التصوير عبر الأوامر الصوتية، وده بعد ما تقول: "هاي فيسبوك"، موجود على ذراع النظارة، زر الطاقة وزر التقاط الصور، بالإضافة لـ سماعتين بحجم صغير، وكمان منطقة قابلة للمس.

من خلال النظارة هتقدر تستقبل المكالمات وكمان تسمع أغاني ومقاطع صوتية، وهي مزودة بـ 3 ميكروفونات لالتقاط الصور أثناء تصوير الفيديو، و بيتم التقاط الصور من خلال النظارة، بالضغط لمدة طويلة على زر التصوير، أما الضغطة السريعة فدي بتصور فيديو قصير مدته 30 ثانية. أما جودة الفيديوهات فهي مقبولة بشكل كبير، ودقة الصور بتوصل لـ 2,592 * 1,944.

وبطارية النظارة معقولة، فهي بتشتغل لحد 6 ساعات، وخلالهم تقدر تشغل موسيقى لمدة ساعة، وتصور 10 صور و 10 فيديوهات وتنقلهم للتطبيق، ونصف ساعة مكالمات. وبيتم شحنها من خلال جراب خاص.

النظارات متوفر ليها تطبيق مخصوص، اسمه "Facebook View"، في ميزة جامدة جدًا، وهي إنك تقدر من خلاله تشارك الصور والفيديوهات لـ حساباتك على فيسبوك وإنستجرام مباشرة، وهو متاح على على نظام تشغيل iOS وAndroid ، وممكن من خلاله استقبال المحتوى وتعديله ومشاركته.

متوفر منها 20 شكل، ومتاحة للشراء عبر الإنترنت وفي متاجر معينة، بـ الولايات المتحدة، أستراليا، كندا، أيرلندا، إيطاليا، المملكة المتحدة، وسعرها 299 دولار أمريكي.