علشان يزود عدد الزباين اللي بييجوا المكان، فيزود المكسب. قرر "يانج" صاحب مطعم صيني للمكرونة، إنه يحط مخدرات في الوجبات اللي بيقدمها. وبالتالي الناس هتدمن الأكل بتاعه، ويرجعوا له تاني. 

والأغرب من كده بقى، هي طريقة كشف خدعة صاحب المطعم. لما واحد من الزباين خضع بشكل مفاجيء لتحليل مخدرات، خلال أحد تحقيقات الشرطة. وكانت النتيجة إيجابية. وبسؤاله أنكر تناوُل أي نوع من المخدرات، والحاجة الوحيدة اللي تناولها قبل التحقيق كانت طبق مكرونة في مطعم محلي.

الشرطة راحت للمطعم وأخدت جزء من التوابل ومكونات التحضير، اللي ثبت بعد كده احتوائها على "المورفين". ولما إدارة المقاطعة زارت المطعم، اكتشفت وجود 76 جرام من مسحوق بذور الخشخاش "الأفيون". تم القبض على صاحب المطعم، اللي اعترف إنه كان بيحط بالفعل مخدرات في الأكل. علشان يزود الزباين ويزود المكسب. وإنه بيجيب الأفيون من نبات الخشخاش، اللي هو بنفسه زرعه من سنين.

الملفت في الأمر إن فكرة ربط الأفيون بالمكرونة، مش جديدة في الصين. في 2014  كانت البداية مع اكتشاف مطعم في مقاطعة شنشي، بيستخدم نفس الخدعة. وفي 2016 تم التحقيق مع حوالي 30 مطعم، بيسخدموا الأفيون في الأكلات علشان يزودوا الزباين.