انتشار فيروس كورونا المستجد، فرض علينا قيود والتزامات كتيرة في حياتنا اليومية. اللي كان منها العزل المنزلي والتباعد الاجتماعي، وعادات التعقيم والتطهير المختلفة. وده خلى تعاملاتنا مع كل المناسبات برضو بقت مختلفة، حسب الظروف اللي إحنا بنمر بيها دلوقتي.

ومن ضمن المناسبات دي، استقبال عيد الفطر المبارك في وقت انتشار الفيروس. اللي منع ناس كتيرة عن شرا الهدوم الجديدة السنة دي، باعتبار إن مفيش خروج أو فسح زي الأول. لكن مامنعش ظهور تقليعة جديدة للعيد، وهي "كمامة العيد". 

انتشرت بين رواد مواقع التواصل الاجتماعي، صفحات بتروج لكمامات بأشكال مختلفة خاصة بمناسبة العيد. وبما إن بقى فيه غرامة على عدم لبس الكمامة، فإقبال الناس على شرا الكمامات هيزيد. وبدأت "كمامة العيد" تلفت انتباه ناس كتيرة.

"كمامة العيد" لها أشكال وألوان مبهجة، وكمان تصميماتها متنوعة علشان تناسب كل الأذواق. بس هل يا ترى هي صحية زي الكمامات الطبية؟ وهل دي هتكون آخر تقاليع كورونا ولا لسه هنشوف جديد؟