كتير من المصريين عندهم فوبيا من البرص، أو زي ما بيسموه "التمساح أو الديناصور الصغير". هو من فصيلة الحرشفيات، ومعروف عن جدعنة المصريين في مطاردة البرص وقتله بالشبشب. لكن هل العادة دي هتستمر لما تعرف أن سعر البرص المصري يبدأ من 2 دولار، وبيوصل لـ 10 دولار؟

قناة DMC عرضت تقرير من منطقة أبو رواش في الجيزة، اللي هما متخصصين في صيد وبيع كائن البرص. اللي بتحتاجه أوروبا وآسيا سواء لدخوله في صناعات محتلفة أو علشان تعمل توازن بيئي محتاجة له. البرص فيه منه أنواع مختلفة وأشهرها: أبو عين واسعة، الأربع نقط، وأبو كف. وكلهم بيتم تصديرهم.

التقرير كشف أن مصر كمان بتستخدمه في البحث العلمي، بخلاف التصدير. وأن أسعار البرص المنزلي بتتراوح بين 2 و3 دولار. والأنواع النادرة زي القفاص، وأصفر البطن سعرهم 10 دولار للبرص الواحد. يعني ثروة قومية ميصحش تضرب بالشبشب.