الفنانة فيفي عبده من أكتر الفنانات اللي بتتواصل مع جمهورها على السوشيال ميديا، بتهتم كمان بجمهورها في كل حتة في العالم، خصوصَا في الوطن العربي، وبتحاول تكلمهم بلهجتهم.
ومؤخرَا أعلنت "فيفي" عن عرض خاص لجمهورها في الإمارات، بحيث يقدروا يشوفوها ويتغدوا معاها كمان، يعني يقضوا وقت لطيف، لكن "إسكوزمي" لازم يدفعوا مبلغ معين!، ماتستغربش وتعالى نقولك التفاصيل.
نشرت "فوفا" على حسابها بإنستجرام، إعلان لمقابلتها مع جمهورها في منتجع "سعديات روتانا" بـ أبو ظبي، بيشمل عرضين تقدر تختار منهم اللي يناسبك.
العرض الأول أو الفئة البلاتينيوم
وجاء بالشكل ده: "استمتع بـ "جلسة مثيرة" لمدة ساعتين مع فيفي عبده، من الساعة 11 الصبح لحد 1 الظهر، بما في ذلك لقاء وتحية، وفرصة تصوير وغداء مع النجمة نفسها، مقابل 1100 درهم، يعني 5500 جنيه مصري. وهيكون يوم السبت والأحد".
العرض الثاني الفئة الذهبية
وتفاصيله: "استمتع بجلسة بعد الظهر مع فيفي من الساعة 4 لحد 5:30 بالليل، بما في ذلك لقاء وتحية، وفرصة تصوير مقابل 750 درهم إمارات للشخص الواحد، يعني 3750 جنيه مصري. وهيكون يوم الجمعة والسبت والأحد".
ملحوظة مهمة علشان تستفاد بالعروض دي، ضروري تكون حاصل على لقاح ضد فيروس كورونا، ومعاك نتيجة فحص PCR سلبية قبل 48 ساعة.
لكن للأسف بعد ساعات قليلة من الإعلان، نشرت فيفي بوست اعتذار لجمهورها، أعلنت خلاله اعتذارها عن "الإيفينت" ده، وإنها مضطرة تأجله علشان مشغولة في مصر، لكن وعدت جمهورها من السيدات إنها هتقابلهم قريب.
