أيام قليلة بتفصلنا عن عيد الأضحى المبارك، واللي يعتبر آخر أيام موسم الحج، اللي بيسعى ملايين المسلمين كل سنة من كل مكان في العالم إنهم يقوموا بيه كفريضة من فرائض الإسلام، وبيوصلوا للأراضي المقدسة بمختلف الوسائل والطرق، سواء بالبر أو بالبحر أو بالجو.

لحد هنا ومفيش أي حاجة غريبة، إنما لما تكون وسيلة المواصلات للأراضي المقدسة هي العجلة، فده كان شئ جديد وغريب في نفس الوقت.

الحكاية إن في 8 شباب من هواة ركوب العجل، قرروا إنهم يستخدموا هوايتهم في شئ مفيد. فكانت أول حاجة قرروا يعملوها، إنهم يوصلوا من العاصمة البريطانية لندن لحد المدينة المنورة (حوالي 6400 كيلومتر) بالعجل بتاعهم.

 

 

في رحلتهم الطويلة دي، واللي هتاخد حوالي 60 يوم. وهيعدوا فيها على 17 دولة، و3 قارات. كانت القاهرة واحدة من محطاتهم، اللي وصلوا لها يوم السبت 27 يوليو.

هدف الرحلة دي، هو جمع 500 ألف جنيه استرليني (يعني حوالي 619 ألف دولار)، علشان يمولوا بيها مشاريع لخدمة الفقراء. زي بناء مدارس ومساجد وحفر آبار مياه. وده هيكون لصالح 5 قرى في باكستان وسريلانكا وجنوب إفريقيا وأوغندا.