"امشي على طول. على طول زي ما بقولك ماتوجعش قلبي".. ده صوت بدرية طلبة اللي هتسمعوه قريب، لما يتعمل أبليكيشن GPS بصوتها. وده اللي قالته بدرية بنفسها، في مداخلة ليها مع الإعلامية إيمان الحصري في برنامج "مساء DMC".

صرحت بدرية في اللقاء، إنه هتيم عمل تطبيق GPS بأبرز الإفيهات المشهورة بيها. وده بعد ما انتشر هاشتاج على مواقع التواصل الاجتماعي، بيطالب بوجود صوت بدرية طلبة على الـ GPS. وإن واحد من المعجبين راح بنفسه لفرع جوجل في مصر، وطرح الفكرة عليهم. اللي تمت الموافقة عليها، وهتبدأ بدرية تسجل خلال أسبوع.

طلبت بدرية من الجمهور على صفحتها على فيسبوك، إنهم يبعتوا الجمل اللي عايزينها تتسجل.

لكن الصفحة الرسمية لجوجل على فيسبوك، نفت أي تغيير في صوت أبليكيشن GPS. وأكدت إنها هتستمر في خدمة الناس بنفس الصوت الموجود حاليًا.

لو كان الموضوع اتنفذ فعلًا، كنت هتلاقي بدرية بتقولك مثلًا "ادخل أقصى اليمين إلهى تنستر". ولو ركنت على جنب تتكلم في الموبايل هتقول لك "عوأت ليه يا واد وغوشتتني عليك".