كشف الفنان الكوميدي أكرم حسني، إنه بيحضر حاليًا لتقديم الجزء الثاني من فيلم "بنك الحظ"، وقال: "بنحاول نسنتثمر الكيميا اللي حصلت بين أبطال الفيلم في الجزء الأول، خاصة إن قماشة "بنك الحظ" تستحمل يتعمل منها جزء ثاني".

أما على جانب الدراما التليفزيونية، وضح خلال لقائه مع النجمة إسعاد يونس في برنامجها "صاحبة السعادة"، إنه هينافس في موسم السباق الرمضاني، من خلال مسلسل جديد اسمه "مكتوب عليا".

وأكد "أكرم" إنه واقع في غرام فكرة المسلسل، وهيبقى دمها خفيف، وإن فريق عمل المسلسل لسه ماكتملش، لكن لحد دلوقتي انضم الفنان عمرو عبد الجليل، آيتن عامر، وريم مصطفى. المسلسل من إنتاج كريم أبو ذكري، وإخراج خالد الحلفاوي.

آخر أعمال أكرم حسني، كان دويتو "لو كنت" مع هيفاء وهبي، وحقق نجاح كبير في الصيف اللي فات. وقتها قابل فريق "كلام القاهرة" النجم الكوميدي، واتكلمنا معاه عن خططه الجاية، وكمان عرفنا منه مفاجآت كتير بيحضر لها الفترة الجاية. شوفوا الحوار بالكامل، من هنا.