الراديو في رمضان له طعم تاني خالص، وخصوصَا قبل الفطار أو الفجر، روحانيات كده وطاقة إيجابية بتغسلنا من جوه، وتخلي يومنا رايق، علشان كده قولنا نجمع لكم أهم 5 مسلسلات هتتذاع على الراديو طول رمضان، بننصحكم تسمعوها:

Big million

لو كنت من واحد عشاق مسلسل "100 وش"، يبقا لازم تتابع المسلسل ده، لإن فكرته بتدور عن شاب وسيم من عائلة مرموقة، عمه بيشترط عليه الزواج، فبيوقعه حظه في فتاة بعيدة جدًا عن خياله، وكمان أبطاله هما الثاني اللذيذ نيللي كريم وآسر ياسين.

هيتذاع على راديو إنرجي، كل يوم الساعة 3:30 العصر، والإعادة الساعة 8:00 بالليل،  وتاني يوم الساعة 1:15 الضهر.

نادي أند رويد

مسلسل كوميدي خفيف، بطولة النجم أحمد عز، واللي هنسمعه بيغني تتر المسلسل باللهجة الصعيدي، وبيشاركه البطولة نسرين طافش، سميحة أيوب، ونجوم كتير.

هيتذاع على راديو نجوم FM، كل يوم الساعة 4:30 العصر.

دايرة الشك

بطولة فريق واما الغنائي، هيتذاع على راديو نجوم FM كل يوم، الساعة 4:55 قبل الفطار.

رحلتي من الشك لبلطيم

مسلسل فانتازيا كوميدي، بيتكلم عن سنة أولى زواج، أحداثه بتدور سنة 2051. بطولة هنادي مهنا وأحمد خالد صالح.

هيتذاع على راديو إنرجي، كل يوم، الساعة 4:30 مساءً، والإعادة الساعة 7:00 مساءً، وتاني يوم الساعة 12:15 الضهر.

إحنا بتوع الأوزوريس

بطولة النجم أكرم حسني، والنجمة أيتن عامر. هيتذاع على راديو نجوم FM كل يوم، الساعة 5:15 قبل الفطار.

رمضان كريم.