من خلال صورة نشرها على حسابه بإنستجرام، كشف الفنان مصطفى درويش عن ميعاد طرح فيلم "بـ100 وش" بطولة نيللي كريم وآسر ياسين في السينمات، واللي هيكون في عيد الفطر الجاي، ده بعد قرار تحويل العمل من مسلسل تليفزيوني لفيلم، وده بعد النجاح الكبير اللي حققه مسلسل "بـ 100 وش" في رمضان 2020.

وبالمناسبة دي، حبينا نفكركم بـ 5 أفلام سينمائية صنعت نجاح الفنانة نيللي كريم والفنان آسر ياسين، وهي:

سحر العيون

حققت نيللي كريم شهرة كبيرة من خلال وقوفها أمام الفنان الراحل عامر منيب، وقدرت تثبت لنا موهبتها الكوميدية، والناس بدأت تحفظ شكلها وتعجب بأدائها التلقائي وملامحها الجذابة.

أنت عمري

مخرج الفيلم خالد يوسف، قدر يخرج قدرات نيللي كريم التمثيلية في الفيلم ده، وكأنه كان بيرسم طريق ليها لوحدها في الدراما لسنين قدام.

غبي منه فيه

قدمت نيللي كريم في الفيلم دور مطربة مغمورة اسمها "سامية"، ويعتبر من أشهر أدوارها في السينما، ورغم مرور أكثر من 16 سنة على الفيلم، لكن لسه فاكرين إسلوبها المميز وريأكشناتها اللذيذة.

الجزيرة

يعتبر مرحلة جديدة في حياة آسر ياسين الفنية، مكنته من أداء دور الرجل الصعيدي، ووضعته في مكانه مختلفة رغم إنه ماكنش البطل الرئيسي للفيلم.

الوعد

قدم آسر ياسين من خلاله شخصية صعبة مشحونة بمشاعر كتير وعكسها، الفيلم ده كان بروفة أداء وتمثيل لقدرات هايلة جه وقتها علشان تطلع للنور.

اللي فات كله، بيثبت لنا إن الفيلم الجديد "بـ100 وش" هيكون تجربة ناجحة بتجمع اتنين من أهم نجومنا المصريين.