عكس معظم الحوارات اللي بنشوفها، طلت الفنانة ياسمين صبري مع الإعلامي الإماراتي أنس بوخش في برنامجه "ABtalks"، المذاع على قناته على يوتيوب، تقريبًا متكلمتش عن حياتها الفنية خالص، الحوار كله كان على حياتها الشخصية أكتر، الأمر اللي غير نظرة كتير من جمهورها عنها، وساب انطباع عندهم إنها مش مجرد شكل لكن كمان مثقفة وبتشتغل على نفسها.

ودي أبرز تصريحات قالتها ياسمين :

1- شعور الامتنان مسيطر عليا أكتر من أي شعور تاني، أنا فعلًا مقدرة كل النعم اللي أنا فيها وبطلب من ربنا يخليني أشوف كل حاجه جميلة.

2- جدتي اللي ربتني، لإن والدتي كانت بطلة سباحة وطول الوقت مسافرة علشان تصرف علينا، خاصة بعد انفصالها عن والدي وقتها كان عندي سنتين.

3- لو قدامي ورقة مكتوب فيها تاريخ وفاتي مش هخاف افتحها، لإن عندي يقين إن الدنيا هي أوحش مرحلة، واللي جاي بعد الموت أجمل بكتير.

4- سعادتي ملهاش علاقة بالفلوس، لكن في عطاء الآخرين حتى لو مجرد إبتسامة.

5- أنا شخصية مريحة وطيبة، مش العيب نقول مميزاتنا زي ما بنقول عيوبنا، بحب نفسي كمان بس مش الحب الأناني اللي دماغنا اتبرمجت عليه.

6- أهم حاجه في الحب هو الاحترام والارتقاء والثقة، الحب عمره ما كان تحكم وغيره ده اسمه تعلق مش حب.

7-ربنا حبيبي وأنا حبيبته عندي يقين في ده، وهو الوحيد اللي أخاف أزعله في الدنيا كلها.

8- مابحبش أزور جدتي في قبرها، علشان هي مش في المكان ده، روحها في مكان أجمل بكتير.

9- بعتبر نفسي بميل للإنطوائية، معنديش شلة هي صديقة واحدة بس، لكن سهلة في التعامل مع كل الناس.

10-ماليش في التجمعات أو القعدة في الكافيهات، يمكن ده يرجع لتربيتي اللي خلتني منضبطة، لكن أحب أحضر كورسات واكتشف حاجات جديدة.

11- مابزهقش ولا بحس بالملل خالص، لإني متصلة بروحي كويس وعارفه أنا عايزة إيه، ومش بستنى حد علشان أعيش حياتي.

12- مجاليش اكتئاب قبل كده، يمكن لإني محافظة على علاقاتي بالآخرين حتى لو في ديرتي الصغيرة، وده كلام الإسلام اللي برضو علم النفس واليوجا بينصحوا بيه.

13- مبزعلش لما الناس تحكم عليا بإني  امرأة جميلة بس، لإن ده تفكيرهم المحدود عني وأنا مش هعرف أغير العالم لكن أعرف أغير نفسي وأطورها.