حالة من الحزن الشديد بتعيشها الفنانة الشابة حورية فرغلي، بعد تغيير شكل وجهها نتيجة كسر في "أنفها"، وده حصل بسبب حادثة سقوطها من فوق "حصان"، الأمر اللي سببلها معاناة نفسية ومهنية كمان، وده اللي وضحته في حوارها مع تليفزيون "اليوم السابع"، التصريحات دي اشعلت السوشيال ميديا في الساعات اللي فاتت، تعالوا نعرف "حورية" قالت إيه:

1- الجمهور بيشتمني وبيوجهلي كلام غير لائق على شكلي ومناخيري.

2- ماخرجتش من غرفتي من 8 شهور بسبب شكلي.

3- أنا بنت ومش قادرة أبص في المراية من سنتين.

4- بخاف من الناس اللي بتشتمني وأنا ماعملتش حاجة.. أنا كنت بمثل مصر في الفروسية.

5- بقالي 4 سنين مابعرفش طعم الأكل ولا بشم بسبب عمليات "أنفي".

6- الكورونا منعتني من السفر لأمريكا لإجراء العملية.

7- هعمل عملية جراحية مع طبيب عالمي علشان أعرف أرجع لشكلي تاني.

8- ماحدش بيسأل عني والكل بعد عني وحتى الناس اللي كنت برعاهم وبيشتغلوا معايا سابوني.

9- تليفوني مارنش من 3 سنين، ماحدش بيدعوني في الحفلات أو المهرجات أو المسرحيات أو أي مناسبة فنية.

10- لو الوسط الفني مش عايزني يقولولي "وأنا هختفي خالص".

 11- لبلبة ورانيا محمود ياسين هما اللي بيسألوا عني بس من الوسط الفني.

12- كنت بتمنى الموت بسبب شتيمة الناس ليا.

 

حورية فرغلي ممثلة مميزة، قدمت في فترة قصيرة مجموعة أعمال مهمة، وإحنا من خلال "كلام القاهرة" بنقول لها: وحشتينا وبنحبك.