بيواجه مطرب المهرجانات عمر كمال، أزمة جديدة مع نقابة الموسيقيين، بعد قرارها الأخير بتحويله للتحقيق، على خلفية حفلته الأخيرة في السعودية واللي غني فيها مهرجان "بنت الجيران".

اللي حصل بالظبط، إن الهيئة العامة للترفية في السعودية، نظمت حفلة جمعت فيها الثلاثي عمر كمال، حسن شاكوش، وحمو بيكا. ضمن حفلات موسم الرياض 2021، يوم 29 نوفمبر اللي فات. ودي أول حفلات عمر كمال في السعودية.

وبالفعل كانت من أنجح الحفلات، وتفاعل معاها الجمهور السعودي بشكل كبير، وبدأوا يشاركوا لقطات وفيديوهات من الحفلة على السوشيال ميديا، وكان من ضمنها فيديو المهرجان المثير للجدل "بنت الجيران"، وهنا قرر "عمر" استبدال جملة "خمور وحشيش" لـ "تمور وحليب"، وبرر ده من خلال حسابه على تويتر وقال: "لايقة على البلد الطاهرة اللي واقفين على أرضها.. وتنفيذ تعليمات سيادة النقيب هاني شاكر .. وفي القاهرة بنقول من غيرك مش هعيش".

لكن "عمر" ماكنش يعرف إنه بكده هيدخل نفسه في مشكلة أكبر، لإن النقابة شافت إن التصريح ده فيه إهانة وإساءة لمصر، لإنه شاف إن السعودية أرض طاهرة ميانفعش يتقال فيها الجملة دي، لكن مصر عادي! طبعًا الأزمة كبرت، لدرجة إنه دخل في خناقة مع الإعلامي أحمد موسى على الهواء، وقاله الأخير "أنا غضبان وزعلان منك، أنت غلطت في حق بلدك وأطالب بمحاكمتك لأنك أهنت بلدك"، فرد "عمر" إنه أصلًا معندوش تويتر، وأضاف "بناء على إيه حكمت عليا بكده، أنا ما قولتش واللي عنده ريكورد ييجي يقدمه، في السعودية بيستقبلوني بالتمور، أنا مجبتش سيرة مصر في حفل السعودية".

أما تعليق الفنان هاني شاكر، نقيب الموسيقين على تصرف عمر كمال، كان: "كلنا استفزنا كلام عمر كمال، وإحنا مش بس بنتحرك علشان ولادنا.. أحنا بنتكلم عن أبناء الأمة العربية كلها، وكل الأراضى العربية طاهرة ومقدسة.. أمال أحنا بنضحى بولادنا ليه؟"، ووضح " لما أنت عارف أن الكلام ده غلط، بتغنيه هنا فى مصر ليه؟"، وأضاف إن هيكون في عقاب كبير للتصرف ده.