الوظايف المكتبية اللي بتتطلب قعدة لفترات طويلة، بتسبب مشاكل صحية كتيرة. وأهمها آلام الرقبة والظهر. وطبعًا بما إن أغلب الناس دلوقتي بتشتغل من البيت، فده معناه إن الآلام بتزيد لإن الحركة أكيد أقل من الأول. فلو انت مضطر تقضي ساعات طويلة تخلص شغلك، وبتحس بوجع في رقبتك، إحنا هنقولك على الحل:
1- الكمادات الدافية
الكمادات الدافية على الرقبة لمدة 20 دقيقة، بتساعد في تسكين الآلام بشكل كبير. لأن الحرارة الخارجة منها بتساهم في استرخاء العضلات المتشنجة. وبتخفف من حدة الالتهابات.
2- تمارين تمدد الرقبة
يُفضل قبل التمارين، الاستحمام بمياه دافية أو عمل كمادات دافيه للرقبة. لإن الاتنين بيساهموا في استرخاء العضلات المتشنجة، وبيخففوا من حدة الالتهابات. بعدها حاول تحرك رقبتك يمين وشمال ببطء وبالراحة. لأن الحركات السريعة والمفاجئة بتزود من شدة الالتهابات والآلام.
3- التدليك
التدليك أو المساج بيحسن تدفق الدم المُحمل بالأكسجين للعضلات، واللي بدوره بيساهم في تسكين الألم وتخفيف التشنجات. لكن ضروري تكون جلسات المساج تحت إشرف طبيب متخصص في العلاج الطبيعي. لأن أي حركة غلط أثناء تدليك الرقبة، ممكن تسبب مضاعفات خطيرة. بتوصل للإصابة بالشلل النصفي أحيانًا.
4- تظبيط وضعية النوم
لو طريقة نومك مظبوطة، ده هيساعدك كتير في علاج آلام الرقبة. لإنها بتساعد على استقامة فقرات العنق وتسكين الآلام واسترخاء العضلات. علشان كده لازم الأشخاص اللي بيعانوا من مشاكل الرقبة، يتبعوا النصايح دي عند النوم:
- النوم على مخدة داعمة للرقبة.
- النوم على مرتبة أكثر صلابة.
- النوم على أحد جانبي الجسم أو على الظهر.
5- ريح جسمك
الإفراط في النشاط البدني خلال اليوم، بيأثر على صحة العظام والمفاصل وبيسبب الإجهاد العضلي. وبالتالي بيسبب آلام الرقبة. وبالتالي لازم تكون حريص على أخذ القدر الكافي من الراحة لجسمك. ولو بتلعب رياضة، قلل من التمارين الرياضية اللي بتثقل على الرقبة. زي رفع الأثقال.
المصدر: الكونسلتو
