كتير بنصحى من النوم في نص الليل، سواء بسبب حاجة مهمة بنفكر فيها وقلقانا، أو من غير وسبب. بتبقى المشكلة إن النوم بيطير من عينينا، وبيكون صعب نرجع للنوم بسهولة.

حسب موقع "ويب طب" في 7 حلول ممكن تعملها لو صحيت لأي سبب، علشان تقدر ترجع للنوم تاني، تعالوا نتعرف عليها: 

1- حاول تتنفس من الأنف، بيساعد على استرخاء وهدوء الجسم. واتجنب التنفس من الفم.

2- مارس التأمل، بيقلل الشعور بالتوتر والقلق. وده لإنه بيبطأ موجات العقل وبيمنعه عن التفكير العميق.

3- خليك في السرير. بلاش تخرج من الأوضة وتقعد في أي مكان في البيت. مش هترجع للنوم بسهولة.

4- ماتستخدمش الموبايل إطلاقًا، لا فيسبوك ولا إنستجرام  ولا ألعاب ولا أي حاجة. هتفوق أكتر لإن الضوء الأزرق الخارج من الموبايل أو التليفزيون من مسببات اليقظة.

5- لو صحيت على كابوس، يُفضل بلاش تشغل بالك وتفكر في تفاصيله. حاول تنساه خالص علشان تقدر تهدى.

6- حاول ماتاكلش لو حسيت بالجوع. الأكل هيفوقك، وهيكون صعب تنام تاني.

7- ابعد عن التوتر تمامًا، وماتشغلش تفكيرك بإنك لازم تنام دلوقتي علشان تعرف تصحى بدري. وابعد عن الساعة لإنها برضو هتحسسك بالتوتر.