بدأ شهر أغسطس، وكالعادة بدأت معاه برامج وعروض نتفليكس المختلفة والجديدة. ما بين مسلسلات وأفلام وعروض وثائقية، وغيرهم. وبما إن القايمة طويلة والشهر مليان مفاجآت، ممكن تحتار شوية في الاختيار. علشان كده إحنا هنقول لك على أهم الأفلام اللي هتكون متاحة الشهر ده على نتفليكس. وضروري ماتفوتكش.. يلا بينا:
Jurassic Park
متاح: 1 أغسطس.
واحد من أفضل الأفلام في تاريخ السينما على الإطلاق. مش بس على المستوى التقني (اللي لحد دلوقتي يبان شكل الديناصورات فيه حقيقي)، إنما كمان على مستوى القصة والعرض. أول مغامرة شوفناها وسط الكائنات العملاقة، وعيشناها بكل تفاصيلها مع الأبطال. ثلاثية "ستيفين سبيلبرج" المميزة، دلوقتي بقت متاحة على نتفليكس.
Eternal Sunshine of the Spotless Mind
متاح: 1 أغسطس.
من وسط كل الأفلام الرومانسية المبهرة اللي اتعملت، يفضل الفيلم ده واحد من أقوى الأفلام على مر السنين. فيلم عمره ما يفقد تأثيره الخاص، مهما مر عليه الوقت. بقصة تلمس المشاعر، إخراج متميز بصورة ممتعة على الشاشة، وأداء أكتر من رائع لـ "جيم كاري" و"كيت وينسليت".. لازم تكون النتيجة تحفة فنية تستمر للأبد.
Nightcrawler
متاح: 10 أغسطس.
النجم "جيك جيلينهال" واحد من أفضل ممثلي هوليوود بلا منازع. والفيلم ده لوحده كفيل بأكيد موهبته. من أفضل الأدوار اللي قدمها، وأكترها رعب في نفس الوقت. فرق بسيط بين الطموح والجنون، يخلي محرر أخبار يعمل المستحيل علشان يوصل لأفضل قصة خبرية. حتى لو على حساب أرواح ناس تانية.
Project Power
متاح: 14 أغسطس
أجدد أعمال نتفليكس الأصلية لأفلام الأكشن بعد Extraction وThe Old Guard. في شوارع "نيو أورلينز" بتنتشر أخبار عن حبوب بتدي لصاحبها قوى خارقة لمدة 5 دقايق. لكن لما بتقع الحبوب في إيد الأشخاص الغلط، بيتم استغلالها بشكل خطير. ساعتها بيتكون فريق من شرطي ومراهقة وجندي سابق، علشان يقضوا على مصدرها.
Secret Origins
متاح: 28 أغسطس
فيلم أسباني عن محقق شرطة، بيتعاون مع صاحب محل للقصص المصورة. علشان يكشف قاتل متسلسل، مفيش أي صلة بين ضحاياه. وبيخلي طريقة قتلهم فيها تشابه مع الأصول السرية للأبطال الخارقين.
Casino Royale
متاح: 31 أغسطس
نقطة ومن أول السطر، "Casino Royale" أفضل أفلام جيمس بوند على الإطلاق. الفيلم اللي قدم "دانيال كريج" للجمهور، في دور العميل 007. وأثبت فيه "كريج" إنه أفضل ممثل قدم الشخصية. وطبعًا قدمها تاني في 3 أفلام من السلسلة، اللي مازلنا في انتظار آخر أفلامها No Time to Die.
دي أهم أفلام نتفليكس لشهر أغسطس، إيه أكتر فيلم مستنيه؟
