أيام قليلة وهتبدأ فعاليات الدورة الـ 14 لبانوراما الفيلم الأوروبي، المقرر إقامتها في الفترة من 17 لحد 26 نوفمبر الجاري، واللي هيتعرض خلالها أكثر من 45 فيلم مصنفين في 6 أقسام مختلفة، وكلها من أحسن الأفلام اللي تم إنتاجها في أوروبا واللي نالت إعجاب وتقدير من المهرجانات العالمية.

بيضم القسم الأول الأفلام الروائية الطويلة، منها فيلم "أسوأ شخص في العالم"، وفيلم "الجريء"، أما القسم الثاني بعنوان "مخرجون صاعدون"، مخصص لتقديم تجارب الأفلام الروائية الطويلة في عرضها الأول، منهم فيلم "لوزو"، والقسم الثالث للأفلام التسجيلية اللي بتعكس وضع عالمنا الراهن ومن ضمنهم فيلم "ماجالوف بلدة الأشباح" من إخراج ميجِل أنجل بلانك.

خصصت البانوراما كمان القسم الرابع لأعمال المخرج البولندي "كرزيستوف كيزلوسكي"، اللي امتد مشواره الفني لـ30 سنة، هيعرض له فيلم "ثلاثية الألوان - أزرق -أحمر –أبيض"، وأفلام تانية.

السنة دي كمان تم إضافة قسم جديد وهو القسم الخامس في البانوراما، هيكون بعنوان "صور خارقة للطبيعة"، ده مخصص للأشخاص اللي بيحبوا السرديات البصرية اللي ليها لغة سينمائية غير مألوفة أو المرعبة، أو المستحيل حدوثها، القسم بيركز على صناع أفلام أبدعوا في تناول نوع معين من السينما وتخطوا عبر الحدود التقليدية للصناعة ومن أبرز أفلامه "أسنان ثلجية" إخراج لوسيل هادزيهاليلوفيتش.

القسم السادس والأخير واللي تم إضافته لبرنامج بانوراما الفيلم الأوروبي، مخصص للأفلام القصيرة بالشراكة مع مهرجان ليدن، هيعرض خلاله 5 أفلام قصيرة للطلبة اتعرضت بالفعل في مهرجان ليدن بالمسابقة الرسمية.

وهيتم عرض الأفلام في أكتر من مكان منهم: سينما زاوية - سينما الزمالك - المركز الثقافي الإيطالي.

علشان تعرف تفاصيل أكتر عن المهرجان وتحجز تذكرتك ادخل هنا.