في تجربة جديدة أقرب للتحدي الفني، بيطل علينا الفنان خالد الصاوي كبطل رئيسي لأحدث أفلامه السينمائية، وهو فيلم "للإيجار"، اللي بيشارك فيه مع "الصاوي" شيري عادل ومحمد سلام. الفيلم بيعتبر أول بطولة مطلقة للفنان خالد الصاوي اللي سبق وأثبت قدراته الفنية في أكتر من عمل فني زي عمارة يعقوبيان والفرح وكباريه وغيرها من الأعمال المهمة.

أحداث فيلم "للإيجار" بتدور في إطار تشويقي كوميدي، عن حياة قبطان على المعاش، عايش في الإسكندرية وبيعرض غرفة من شقته للإيجار، علشان يكسر حالة الوحدة والعزلة اللي بيعاني منها، وبتتصاعد الأحداث والمواقف بشكل كوميدي لطيف.

فيلم "للإيجار" كان اتعرض أول مرة في المسابقة الرسمية لمهرجان الأقصر للسينما الإفريقية فى دورته اللي فاتت، وهو من تأليف وإخراج إسلام بلال، وبيشارك في بطولته ياسر الطوبجي، هايدي رفعت، عصام السقا، وعدد من ضيوف الشرف.

بنتمنى التوفيق للفنان المتميز خالد الصاوي.