أعلن القائمين على مهرجان كان السينمائي الدولي، عن انضمام فيلم "سعاد" للمخرجة أيتن أمين، للاختيارات الرسمية للدورة 73 من المهرجان. واللي كان مقرر تقام السانة دي 2020، لكن تم إلغائها بسبب انتشار فيروس كورونا.

تعالوا نتعرف أكتر على فيلم "سعاد":

1- "سعاد" هو أول سيناريو فيلم للكاتب محمود عزت.

2- يعتبر ثاني تجربة روائية طويلة للمخرجة أيتن أمين بعد فيلم "فيلا 69"، اللي تم عرضه لأول مرة عالميًا في مهرجان أبو ظبي السينمائي.

3- أيتن أمين حاولت سنين تلاقي تمويل للفيلم، بدون ما تفرض عليها أي جهة إنتاج شروط معينة. علشان يخرج العمل في النهاية حسب رؤيتها.

4- شارك فى إنتاج الفيلم، المنتجة التونسية درة بوشوشة. بالإضافة لمارك لطفي ومحمد حفظي.

5- الفيلم حصل على جائزة التطوير، في الدورة اللي فاتت من مهرجان الجونة.

6- "سعاد" مش أول فيلم مصري يشارك في مهرجان "كان"، وسبقه أفلام: دنيا لمحمد كريم سنة 1946 - ابن النيل وصراع في الوادي للراحل يوسف شاهين سنة 1952 و1954 - ليلة غرام لأحمد بدرخان سنة 1952.

وكان فيلم "يوم الدين" للمخرج أبو بكر شوقي، هو آخر الأفلام المصرية اللي انضمت لقائمة ترشيحات مهرجان "كان"، سنة 2018.

الأفلام المرشحة للمشاركة في المهرجان لعام 2020، هيتم عرضها في فعاليات السنة الجاية. ومن المقرر إنها تاخد علامة شرف من المهرجان، كنوع من تعزيز أوراق اعتماد توزيعها بشكل أفضل وأسهل.