دفعة جديدة من الأفلام هتستقبلها السينمات خلال الأيام القليلة الجاية، استعدادًا للمنافسة في موسم أفلام عيد الأضحى 2022، الجميل إن الأفلام مش شبه بعض خالص، وبتتنوع ما بين التاريخي والرومانسي والكوميدي والأكشن.

ودي قائمة بالأفلام الجديدة اللي هنشوفها في موسم عيد الأضحى 2022.

هيتم طرحه في دور العرض السينمائية يوم الخميس 30 يونيو الجاي، أحداثه بتحكي عن الفترة التاريخية من سنة 1919 لـ 1924. وقت المقاومة الوطنية ضد الاستعمار البريطاني، من خلال عرض قصص عمليات بطولية، نفذها أبطال مجهولين، دخلوا في معارك وضحوا بأرواحهم، علشان يوصلوا بمصر للاستقلال.

بيشارك في بطولة الفيلم النجمين كريم عبد العزيز وأحمد عز، بجانب عدد من النجوم وهم روبي، هند صبري، أحمد مالك، هدى المفتي، علي قاسم، محمد عبد العظيم، تامر نبيل، عارفة عبد الرسول، سيناريو وحوار أحمد مراد، إخراج مروان حامد.

بيعيش النجم تامر حسني قصة حب مع هنا الزاهد، خلال أحداث الفيلم، بجانب وقوعه في مغامرات عاطفية تانية. هيتم طرحه في دور العرض يوم 7 يوليو.

الفيلم من إنتاج حسام حسني، تأليف وإخراج وبطولة تامر حسني في أول تجاربه الإخراجية، وبيشارك في بطولته: حمدي الميرغني، هدى المفتي، مدحت تيخة، شهد الشاطر، وعالية راشد.

في إطار كوميدي بيجسد محمد إمام شخصية ملاكم، بيشتغل في مركز رياضي، بيتورط مع صديقه في جرائم تزوير أموال، وبتتصاعد الأحداث بشكل تشويقي. هيتم طرحه يوم 7 يوليو في السينما. 

بيشارك في بطولة "عمهم" عدد من الفنانين منهم محمد لطفي، هدى المفتي، محمد سلام، آيتن عامر، باسم سمرة، محمد ثروت، ونجوم أكتر، تأليف وسام صبري، وإخراج حسين المنباوي.