حقيقي من غير مبالغة، فيلم Marriage Story اللي قدمته نتفليكس من أحلى أفلام السنة. القصة بتدور عن زوجين عاديين، تشارلي "آدم درايفر" ونيكول "سكارليت جوهانسون"، بيمروا بإجراءات الطلاق، وفي نفس الوقت لسه باقيين على بعض وحابين بعض. لكن ماينفعش يكملوا. ده غير إن في طفل، خلى الانفصال صعب. زي استمرارهم مع بعض ما بقى صعب.

السطور اللي جاية فيها حرق لبعض أحداث الفيلم.

قصة عادية جدًا ومفيهاش افتكاس، إنما الفيلم يفضل حلو ومميز بشكل كبير. ودي الأسباب:

أولًا - السيناريو

طريقة عرض ارتباط الاتنين ببعض حلوة أوي. اتنين بينفصلوا ومع ذلك إحنا شايفينهم لايقين على بعض جدًا. وده بان في أكتر من مشهد: لما كانوا مع المحامين وبيطلبوا أكل، تشارلي ماعرفش يختار حاجة. فقامت نيكول طلبت له الأكل بتاعه – لما بوابة البيت بتاعها ماقفلتش، كلمته علشان ييجي يصلحها – علاقة تشارلي القوية بحماته – وهي بتربط له الكوتشي أو بتقص له شعره. كلها مواقف بين اتنين عايشين مع بعض ولبعض بس.

- اهتمام "تشارلي" بقربه من ابنه، اللي خلاه يأجر شقة في لوس أنجلوس علشان يكون قريب منه. رغم إن فرصة العمر بتاعته كانت في نيويورك.

- لما "نيكول" سمحت لـ "تشارلي" ياخد الطفل، في اليوم المخصص ليها هي. بعد ما رفضت أول مرة في مشهد الخناقة بينهم.

- عدم رغبة "نيكول" إن المحامية بتاعتها تطالب بفلوس الجايزة، اللي فاز بيها "تشارلي".

كل دول وأكتر من المواقف اللي بتبين قد إيه كل طرف باقي على التاني، ومهتم يعمل أفضل حاجة للطفل.

ثانيًا - الأداء

- اللي شاف الفيلم أكيد اندهش بأداء "سكارلت جوهانسون". حاجة منتهى الجمال. مشهد الـ 10 دقايق اللي بتحكي فيهم ليه عايزة تسيبه، روعة. مش ممكن الأداء العالمي ده.

- مشهد خناقة "أدام درايفر" معاها لما راحت له الشقة. مش ممكن القوة اللي قدر يوصل بيها إحساس الشخصية. كان هايل. ده واحد كان قوي واتكسر. واحد فجأة لقى الدنيا اتطربقت فوق دماغه، ومش عارف يعمل إيه. وفي الأخر لما بيبكي هي اللي بتواسيه، علشان برضو بيحبوا بعض.

- الربكة اللي كان فيها "تشارلي" لما الست جتلهم البيت علشان تقيمه. قد إيه بيحاول يبين اهتمامه بابنه وقربه منه، ومع ذلك كل حاجة بتمشي عكس المطلوب. وانتهت بإنه جرح نفسه قدامها بالسكينة.

ثالثًا - الإخراج

- المخرج "نوا بومباك" عامل شوية مشاهد فظيعة في الفيلم. من أول بداية الفيلم الملفتة، وصوت كل واحد بيتكلم عن مميزات التاني، مع اللقطات. دي لوحدها تخليك كمشاهد ترتبك. عايز تعرف إيه اللي ممكن يحصل يخليهم ينفصلوا. إزاي وهم لايقين على بعض كده.

- المشهد لما راح يصلح لها البوابة. لما كانوا بيقفلوها كده، وفي آخر لحظة كل واحد بيبص للتاني، والبوابة تتقفل. ده مشهد خرافي. كل الكلام اتقال في اللقطة دي بس.

- المشاهد المعمولة one shot كلها حلوة. منها أغنية "تشارلي" في آخر الفيلم.

دايمًا بنقول إن الأهم من القصة، هو سرد القصة. علشان كده في أفلام قصتها بتبقى عادية، لكن بتكون هايلة جدًا.. زي Marriage Story.

تقييمنا للفيلم ده 8/10. 

لو شوفتوه شاركونا برأيكم عنه في التعليقات.