في الساعات الأخيرة، حقق فيلم "ريش" حالة من الجدل بين الأوساط الفنية وعلى السوشيل ميديا، وده بعد عرضه في مهرجان الجونة السينمائي، بسبب انسحاب عدد من الفنانين أثناء عرضه بحجة إنه بيشوه صورة مصر.

في البداية انسحب الفنان شريف منير، وبعده أحمد رزق وأشرف عبد الباقي، والمخرج عمر عبد العزيز، وبرروا ده بإنهم شايفين من وجهة نظرهم، إنه الفيلم بيسئ لمصر، خاصة إنه بيعرض العشوائيات بشكل مستفز غير الموجود في الواقع خالص، بحسب تعبيرهم.

صناع الفيلم، وعلى رأسهم المنتج محمد حفظي، كان ردهم إن الفيلم أصلًا خيالي من إبداع المخرج عمر الزهيري، وما يعتبرش فيلم وثائقي ولا بيحمل إي إسقاطات مجتمعية، ومن الطبيعي إن أي فيلم يعجب ناس وناس تانية ماتحبهوش.

لكن اللي ناس كتير مش عارفينه، إن وزيرة الثقافة إيناس عبد الدايم، كرمت صناع فيلم "ريش" بنفسها، واعتبرته إنجاز تاريخي وبيقدم مستوى فني مميز، وده خلال احتفالية نظمها المركز القومي للسينما، في شهر أغسطس اللي فات، بعد فوزه بـ الجائزة الكبرى في مسابقة أسبوع النقاد بمهرجان كان السينمائي العام، كأول أول فيلم مصري يفوز الجائزة الكبيرة دي.

فيلم "ريش" بيحكي قصة أم حياتها بتتقلب بعد ما جوزها بيتحول لـ "فرخة" بالغلط، بسبب غلطة غير مقصودة من ساحر في عيد ميلاد ابنهم الصغير، وبتضطر تخرج للحياة العملية، علشان تصرف على أسرتها، ووسط كل ده بتحاول ترجع جوزها لطبيعته.