الرجوع للسينما وحشنا تاني، بعد أجازة طويلة أجبرتنا عليها أزمة فيروس "كورونا" المستجد. وقريبًا جدًا هنستمتع بفيلم كوميدي مميز في السينمات، وهو فيلم "النمس والإنس"، واللي انتهى فريقه من تصوير كل مشاهده، وحاليًا بيقوم المخرج شريف عرفة بمونتاج ومكساج ووضع الموسيقى التصويرية الخاصة بالفيلم.
ومن المتوقع إن الفيلم يكون جاهز للعرض في السينمات في ميعاده النهائي وهو موسم عيد الفطر الجاي.
تعالوا نتعرف على أبرز شخصيات "النمس والإنس":
محمد هنيدي
طبعًا هو بطل العمل، وهيجسد فيه شخصية موظف حكومي فقير، بيورث بيت رعب في الملاهي، وبتتصاعد الأحداث فى إطار من الرعب الكوميدي.
منة شلبي
بتقوم بدور عفريتة بتحب "هنيدي"، لكن بيظهر الفنان عمرو عبد الجليل أمام استمرار قصة الحب دي، وبيدخلوا كلهم في صراعات طوال الأحداث بشكل كوميدي مرعب.
سليمان عيد
بيظهر في دور عفريت بيتحول لـ حرباية، وبيرعب بطل العمل بتغيير ألوانه.
وإلى جانب الأبطال اللي فوق دول، هنشوف كمان صابرين وبيومي فؤاد ومحمود حافظ وصلاح عبد الله وشريف الدسوقي وعارفة عبد الرسول ومجموعة من الوجوه الجديدة.
والفيلم من تأليف كريم حسن بشير، وإخراج شريف عرفة.
