طبعًا انتشار فيروس كورونا المستجد، اتسبب في تعطيل عدد كبير من الفعاليات والمشاريع. من ضمنها قفل قاعات السينما في العالم، وإلغاء عدد كبير من مهرجانات الأفلام العالمية. لكن واضح كده إن الموضوع ده له جانب إيجابي..

لأن منصة يوتيوب وشركة "ترايبيكا"، أعلنوا تنظيم مهرجان "كلنا واحد: مهرجان الفيلم العالمي". اللي هيتم من خلاله عرض أفلام 20 مهرجان سينمائي عالمي، مجانًا على يوتيوب. المهرجان هيبدأ يوم 29 مايو، وهيستمر لحد يوم 7 يونيو. ومن ضمن المهرجانات المشاركة: مهرجان برلين - كان - البندقية - صندانس - تورونتو - ترايبيكا - القدس - مومباي - سيدني - طوكيو - لندن، وغيرهم من أشهر مهرجانات العالم.

مهرجان "كلنا واحد" هيعرض أفلام روائية، وثائقية، موسيقية، وكوميدية. وغالبًا العرض هيكون خالي من الأفلام الرئيسية الجديدة، اللي بتعرض لأول مرة عادة في مهرجانات للأفلام. بس لحد دلوقتي ماتمش الإعلان عن تفاصيل برنامج العرض.

أفلام المهرجان هيتم بثها للمشاهدين مجانًا، لكن هيتطلب منهم التبرع لصندوق تضامن منظمة الصحة العالمية، لفيروس كورونا.