حالة من الإثارة عملها فيلم "الممر" إمبارح، بعد عرضه على القناة الأولى الأرضية وقناة ON E. بالتزامن مع الذكرى الـ 46 لحرب 1973. وخلى كل الناس كنت قاعدة قدام التليفزيون، بشكل مش بنشوفوا غير وقت الماتشات المهمة. 

الفيلم طبعًا مامرش مرور الكرام على الشاشة، ده قلب السوشيال ميديا واتصدر تريند "تويتر". وبدأت الكوميكس اللطيفة تنشر على السوشيال ميديا، عن الفيلم وعن حرب أكتوبر بشكل عام. والكل كان بيشارك برأيه في الفيلم وبيعلق عليه.

 

لكن ناس كتير اتضايقت من كمية الإعلانات اللي ااتعرضت خلال الفيلم. وده خلى الشركة المتحدة للخدمات الإعلامية، تعلن الفيلم هيتعرض النهاردة الإثنين الساعة 5 مساءً على قناة ON E بدون فواصل إعلانية. ويوم الخميس 10 أكتوبر على قناة دي إم سي الساعة 11 مساءً، وعلى الفضائية المصرية يوم الجمعة 11 أكتوبر الساعة 10 مساءً.

الفيلم بيدور عن عملية سرية بتنفذها فرقة من قوات الصاعقة، خلال حرب الاستنزاف. وبيضم مجموعة كبيرة من الفنانين منهم أحمد عز، أحمد رزق، إياد نصار، محمد فراج. ومن تأليف وإخراج شريف عرفة.