عادي جدًا تكون بتحب الأفلام بس مش غاوي خروجات وسينما. فطبعًا ملاذك الأول والأفضل دائمًا، هو المشاهدة أونلاين. فلو محتار تتفرج على إيه، إحنا هنقولك على أفضل الأفلام الموجودة أونلاين، بأفضل الجودات. وكمان متاحة للتحميل.. يلا بينا:
Ford v Ferrari
لو غاوي أفلام السرعة والسباقات، ده واحد من أفضل أفلام سباقات السيارات على الإطلاق. مصمم السيارات "كارول شيلبي"، بيتعاون مع السائق المحترف "كيم مايلز". وينتجوا أفضل سيارة سباق لفورد، تقدر تنافس سيارة فيراري. خلال سباق "لو مان" سنة 1966.
Doctor Sleep
الفيلم مبني على رواية للكاتب "ستيفن كينج" بنفس الاسم، وهو تكملة لفيلم The Shining إنتاج 1980. بتدور أحداثه عن الطفل "دان تورانس" بعد ما كبر، وبيقابل بنت صغيرة عندها نفس قدراته. وبيعمل المستحيل علشان يحميها من جماعة اسمها (ترو نوت)، بتتغذى على الأطفال اللي عندهم قدرات خاصة، علشان يفضلوا عايشين.
Joker
الفيلم اللي حصل عنه النجم "واكين فينيكس"، على أوسكار أفضل ممثل. بيقدم سرد لقصة حياة كوميديان جوثام الفاشل "آرثر فليك". والمواقف الصعبة اللي بيمر بيها في حياته، لحد ما يتحول لـ (جوكر).
Knives Out
يوم الاحتفال بعيد ميلاده الـ 85، بيتم اكتشاف جثة روائي قصص الجريمة "هارلن ثرومبي" في القصر بتاعه. وده أثناء وجود كل أفراد العيلة للاحتفال. وبيتم تعيين المحقق الخاص "بلونك بينوا"، اللي بيدور على الأدلة وسط شبكة من الأسرار والألغاز، لحد ما يكتشف القاتل الحقيقي.
المخرج "ريان جونسون" بيعمل حاليًا على جزء تاني من الفيلم.
Jojo Rabbit
خلال الحرب العالمية الثانية، بينضم الطفل "جوجو" للخدمة في الجيش الألماني. وبالصدفة بيكتشف إن والدته مخبية طفلة يهودية في البيت. ساعتها لازم "جوجو" يعيد ترتيب كل مفاهيمه، وسط عدد من المغامرات الكوميدية اللي بيقوم بيها مع صديقه الخيالي "هتلر".
21 Bridges
عملية سطو على مخزن خمور لسرقة كمية من المخدرات، بتحصل خلال منتصف الليل في (مانهاتن). الشرطة بتعترض العملية، والنتيجة وفاة عدد من أفرادها على إيد الاتنين اللي نفذوا العملية. المحقق "أندريه" بيتولى القضية، وقدامه 5 ساعات بس علشان يقبض على المهتمين.
Frozen 2
بعد ما قدرت تشيل لعنة الشتاء الأبدي عن مملكتها، الملكة "إلسا" بيجيلها نداء غريب، من جزيرة مسحورة وبعيدة. فبينضم لها أنا، كريستوف، أولاف، وسفين، ويبدأوا مغامرة جديدة. بيعرفوا فيها إجابات عن عالم مجهول وسط الغابات.
Midway
لو بتحب أفلام الحروب، استعد لساعتين وتلت من المعارك الجوية العنيفة، لأن الفيلم بيدور عن معركة "ميدواي" خلال الحرب العالمية الثانية، واللي كانت بين الأسطول الأمريكي، وقوات البحرية اليابانية. الفيلم بيعرض قصص القادة والجنود، اللي شاركوا في المعركة وكانت حياتهم على وشك النهاية.
Ad Astra
الفيلم هيسافر بيك لعالم الفضاء الخارجي، في رحلة مع رائد الفضاء "روي ماكبيرد"، اللي بيحقق في سر اختفاء والده خلال رحلة قام بيها من 30 سنة. ويكشف أسرار لها علاقة بأمن الكوكب.
A Beautiful Day in the Neighborhood
الرئع "توم هانكس"، الحاصل على جائزتين أوسكار، بيلعب دور مقدم برامج الأطفال الشهير "فريد روجرز". وعلاقة الصداقة اللي ربطته بالصحفي "توم جونود".
Maleficent: Mistress of Evil
لو استمتعوا بالجزء الأول، فالجزء ده بياخد القصة لمرحلة مختلفة تمامًا. الأميرة "أورورا" قررت تتجوز الأمير "فيليب". لكن الأحداث بتاخد منحنى خطير كبير، لما "ماليفسنت" تكتشف إن في مؤامرة بتتعمل ضدها. وهيروح ضحيتها كل كائنات المملكة. والقصة المرة دي أكبر لأننا بنتعرف أكتر على أصل "ماليفسنت" والمكان اللي جت منه.
كل اللي محتاج تعمله، تفتح جوجل وتكتب "مشاهدة فيلم...". بس كده.
سهرة منزلية ممتعة.
