الخميس اللي فات اتعرض فيلم Joker في سينمات القاهرة. ومش هنبالغ لو قولنا لكم إن كل الحفلات تقريبًا بتكون كاملة لحد دلوقتي. الفيلم تحفة فينة بكل ما للكلمة من معنى. وحقيقي من أحسن أفلام السنة.
إحنا شوفنا الفيلم وانبهرنا به. وقولنا نختصر لكم مميزات التجربة الرائعة دي في كام نقطة، لأن ده فيلم مايتفوتش ولازم يتشاف:
- أداء "ووكين فينيكس"
مفيش أدنى شك إن شخصية الجوكر اللي لعبها "هيث ليدجر"، كانت عظيمة وهنفضل فاكرينها. لكن "فينيكس" عمل نقلة، وقدر يتقمص الشخصية بكل أبعادها. وقدمها بكل مراحل تطورها، من أول شخص عادي يكاد لا يُذكر، لشخصية الجوكر اللي كلها شر وكراهية. وراك إيه اللي حصل لـ "آرثر فليك" الكوميديان الفاشل، علشان يوصل للدرجة دي. ده بالإضافة لتفاصيل الشخصية اللي مش هنحرقها عليكم، ونسيبكم تستمتعوا بيها.
- إخراج وصورة مبهرة
المخرج "تود فيليبس" كان بيقدم لوحات فنية مش بس مشاهد. الفيلم مليان كادرات رائعة بمعنى الكلمة. انت بتتفرج وعينك مخطوفة بالصورة وألوانها وتفاصيلها. خاصة وانت قدام شاشة السينما الكبيرة. يعني حتى المشاهد اللي مفيهاش كلام، بتركز فيها أوي. مبسوط باللي انت شايفه.
- قصة متكاملة ومستقلة
الفيلم درامي بحت مش من أفلام السوبر هيروز. ومستقل مالوش علاقة بأفلام سابقة، فانت مش محتاج تشوف أي فيلم قبله عن شخصية الجوكر علشان تفهمه. وزي ما وضحنا إنه بياخدك في رحلة لتطور البطل، لحد وصوله لشخصية الجوكر. فانت فاهم إيه اللي حصل، وليه بيعمل كده. يعني كل حاجة قدامك مبررة، مش مجرد أفعال وخلاص.
- الموسيقى
موسيقى الفيلم ممكن أصلًا تسمعها لوحدها من غير أي حاجة. الموسيقى خلت كل مشهد حكاية لوحده. انت بتتأثر و تتحرك مع كل مشهد، سواء سسبنس أو مشهد فرح ورقص.
- تركيز من أول لحظة
يمكن في ناس شايفة إن رتم الفيلم بطيء. لكن الحقيقة الفيلم عارف ياخد تركيز من أول مشهد. انت طول الوقت عايز تعرف إيه اللي هيحصل، ويا ترى إيه اللي هيتم في المشهد الجي. ودي حاجة تُحسب لفيلم درامي، مفيهوش أجواء الأكشن والمطارادت والإثارة بتاعت أفلام الأبطال الخارقين.
- تجربة ماتتكررش
حقيقي الفيلم ده تجربة مميزة، سواء هتروحه مع أصحابك أو لوحدك. لأنك في الحالتين هتنبسط جدًا جدًا. وبصراحة من الأفلام القليلة اللي ماينفعش تتفوت في السينما حتى لو انت مش غاوي سينما.
سواء شوفتوا الفيلم أو لسه هتروحوا تشوفوه.. شاركونا برأيكم في التعليقات.
