بعد عرضه في "الجونة" من ساعات، عرض مهرجان الجونة السينمائي، فيلم "قمر 14"، ضمن برنامج عروض الاختيار الرسمي خارج المسابقة، واللي بيقوم ببطولته عدد كبير من الفنانين.
الفيلم واجه بعض الانتقادات، منها إنه بيتشابه مع فيلم "هيبتا"، تعالوا نعرف صناع الفيلم قالوا إيه عنه. نفى محمود زهران مؤلف الفيلم، أن يكون في تشابه بين فيلمه "قمر 14" وفيلم "هيبتا"، وأضاف إن التشابه الوحيد هنا هو إن الفيلمين بينتموا لنوعية الأفلام الرومانسية.
"البطولات الجماعية ممتعة للمشاهد أكتر، لأنه بيشوف الناس اللي بيحبهم بيعملوا أدوار حلوة"، دي كانت وجهة نظر الفنان أحمد الفيشاوي عن مشاركته في الفيلم.
كمان الفنان أحمد مالك، قال إنه مش المفروض يتم قياس أهمية الأدوار بحجمها، خاصة إن الفيلم بيضم أدوار كتير مهمة ومؤثرة ومع ذلك مساحتها صغيرة. كشفت الفنانة مي الغيطي، إن المخرج هادي الباجوي، قبل مرحلة المشاركة في الفيلم سألها بعض الأسئلة الشخصية، علشان يتعرف على شخصيتها أكتر.
أما المخرج هادي الباجوي، فأكد إن الفيلم بيحكي عن قصص الحب والرومانسية اللي بنعيشها، بجانب تأثير اكتمال ليلة اكتمال القمر- المأخوذ منها اسم الفيلم- على قرارات الأبطال في المواقف اللي بتقابلهم.
قال كمان إنه قدم فيلم مختلف شوية، لإن اعتبر نجومه ضيوف شرف، كلهم بيظهروا دقائق قليلة بس على الشاشة، وده لإنه اهتم بالفيلم على أساس القصة أكتر من حجم دور الممثل.
