عارف لما تشوف تريلر لمسلسل جديد عن قصة معروفة، فتتوقع ببساطة إنها تطلع مكررة ومابتقدمش جديد؟
أهو العكس بالظبط حصل معانا، لما شوفنا تريلر نتفليكس لمسلسل Dracula، وبعدين اتفرجنا عليه.
في ترانسيلفانيا 1897، مصاص الدماء الأشهر كونت "دراكيولا"، بيخطط للسفر لإنجلترا. علشان يدور على دم جديد. في نفس الوقت الراهبة "أجاثا" من دير سانت ماري في بودابست، بتحاول بكل طرق البحث والتحقيق، إنها تتعرف أكتر على دراكيولا. علشان تعرف إزاي تقضي عليه.
مبدأيًا، حط على جنب أي عمل اتعرض قبل كده عن دراكيولا ومصاصين الدماء. لأن المسلسل ده فعلًا غير أي حاجة انت شوفتها. سير الأحداث واخد شكل مختلف، والتشويق فيه بيخطفك أول ما بيبدأ. ده كفاية إن اللي عمله هم "مارك جاتيس" و"ستيفين موفاك"، صناع مسلسل Sherlock.
القصة معروفة لأنها مبنية على الرواية الأصلية "دراكيولا"، للمؤلف الأيرلندي (برام ستوكر). لكن المختلف هنا طريقة عرضها. لأنها مش بس قايمة على الرعب والخوف. إنما الدراما لاعبة فيها دور مهم وكبير. بالإضافة لعنصر الغموض في القصة، والألغاز اللي مالية الأحداث. كل ده بيخليك طول الوقت مشدود وبتفكر في اللي بيحصل. ده غير بعض التفاصيل المختلفة، اللي خلت أحداث المسلسل مميزة عن غيرها.
الجميل كمان في المسلسل، اللي عدد حلقاته 3 بس، إن كل حلقة مدتها ساعة ونص كاملة. فكأنك بتتفرج على فيلم كامل. وكل نهاية بتحمسك أكتر للحلقة للي بعدها.. خاصة نهاية الحلقة التانية، اللي كانت أكتر من رائعة.
برضو عجبنا اختلاف زمن الأحداث، وإزاي تم الربط بينهم بذكاء. بس الجزء ده مش هنتكلم فيه بتفاصيل، علشان مانحرقش عليكم حاجة. ونسيبكم تستمتعوا بالمشاهدة.
بالنسبة للتمثيل فأهم شخصيتين هم: دراكيولا – الراهبة أجاثا
الممثل الدنماركي "كلاس بانج" ده طلع مفاجأة. قدم شخصية دراكيولا بشكل ماشوفناهوش قبل كده. إحنا بنتفرج على مصاص دماء بيقتل ويرتكب جرايم، وبنشوف برضو البعد الدرامي في شخصيته. مع لمسة كوميديا خفيفة، خلت الدور أحلى وأحلى. الشخصية اترسمت بشكل مختلف وأبعاد مختلفة، وهو بالفعل كان مناسب للاختلاف ده.
"دولي ويلز" اللي لعبت درو أجاثا، كانت روعة. الراهبة المعترضة على قيود تعاليم الكنيسة، خاصة في الأمور الغامضة. ومصممة تدور وتحقق ورا كل حاجة بتحصل. ورغم إن أسلوبها بيضايق البعض أحيانًا، لكنها دايمًا مكملة ورا الهدف اللي بتسعى له.
بشكل عام عجبنا إننا بنشوف قصة صحيح معروفة، لكن بتناوُل وسرد وأحداث مختلفة عن اللي قبلها. وده كان، لحسن حظنا، عكس اللي توقعناه من التريلر.. علشان كده تقييمنا للمسلسل هو 10/10.
لو شوفتوا المسلسل شاركونا برأيكم في التعليقات.
