لمة العيلة في العيد ليها طعم تاني، وحلاوتها بتزيد لما بنتشارك على حاجة بنحبها، ومين ميحبش السينما وحكاياتها، علشان كده جمعنالكم أفلام جديدة هتتعرض لأول مرة على الشاشات خلال أيام عيد الأضحى 2022.

الجريمة

هيعرض على قناة "إيه آر تي أفلام 1"، ثاني أيام عيد الأضحى، الساعة 8:00 بالليل، أحداثه بتدور فى فترة السبعينيات، عن مجرم محترف، بيرتكب جرائم كتير لصالح شخصيات عندها نفوذ. بطولة أحمد عز، منة شلبي، ماجد الكدواني، سيد رجب، رياض الخولي، نبيل عيسى، محمد الشرنوبي، ميرنا نور الدين، وناردين فرج.

بالإضافة لده، أعلنت منصة "شاهد" عن عرض أحدث الأفلام على منصتها ومنها:

حامل اللقب

"يحيى" لاعيب كرة القدم وزوجته "مسك" بتشتغل طبيبة أمراض نساء، نفسهم يخلفوا طفل من سنين، وفي إطار من الفانتازيا بتحصل حاجة في وقت غير مناسب، وبيلاقوا نفسهم في مواجهة موقف صعب، بيحاولوا يلاقوله حل بطريقة كوميدية.

الفيلم بطولة دينا الشربيني، هشام ماجد، محمد سلام، أحمد فتحي، محمد كيلاني، محمد ثروت، دنيا ماهر، ليلى عز العرب، ويزو.

الغسالة

في إطار كوميدي بتدور أحداث فيلم "الغسالة"، عن غسالة ممكن من خلالها السفر في الزمن. وده بيوقع الأبطال في عدد من المشاكل والمغامرات. بطولة هنا الزاهد وأحمد حاتم.

تمسايح النيل

في إطار كوميدي بيجسد الفنان خالد الصاوي دور رجل غني، بيتعرض لعملية نصب من مصطفى خاطر وحمدى الميرغني خلال رحلة بحرية. معظم مشاهد الفيلم اتصورت على مراكب النبيلة في أسوان. بيشارك في البطولة عدد من الفنانين الشباب منهم: هنادي مهنا، بيومي فؤاد، ويزو، محمد جمعة، سليمان عيد، بدرية طلبة، وسوزان نجم الدين، ونجوم أكتر.

بنتمنى ليكم مشاهدة ممتعة مع حبايبكم!