"والله لسة بدري يا شهر الصيام!".. أيام وهنودع الشهر الأعز على قلوب كل المصريين بطقوسه وروحانياته الجميلة، وهنعيش حالة جديدة من البهجة مع عيد الفطر المبارك، واللي مايحلاش من غير خروجاته اللي بنعمل فيها أحلى ذكريات، وطبعًا السينما وأفلامها بتكون على رأس القائمة وخروجة مميزة في العيد.
وبالمناسبة دي، جمعنا لكم في "كلام القاهرة" الأفلام اللي هتتعرض بشكل رسمي خلال أيام العيد في السينمات.
واحد تاني
النجم المحبوب أحمد حلمي راجع للسينما، بفيلم "واحد تاني"، هيظهر خلاله أحداث الفيلم بشخصيتين مختلفين عن بعض. بيشاركه في البطولة عدد من الفنانين منهم: عمرو عبد الجليل، روبي، أحمد مالك، نسرين أمين.
العنكبوت
اتأجل طرحه 3 سنين لأكتر من سبب، الفيلم هيجمع السقا ومنى زكي بعد غياب، أحداثه بتدور في إطار من الأكشن والرومانسية، بيواجه "السقا" صراعات مع رجال المافيا بسبب سلوك أخوه اللي بيجسد دوره "ظافر العابدين"، والكل بيبحث عن "العكنبوت"، خاصة إن "السقا" طول أحداث الفيلم بيكون متخفي في ماسك وبدلة سوداء فى كل عملية بيقوم بها.
بيشارك في بطولة الفيلم عدد من النجوم، زي: يسرا اللوزي، أحمد فؤاد سليم، محمد لطفي، زكي فطين عبد الوهاب، شيماء سيف، إخراج أحمد نادر جلال، وتأليف محمد ناير، وإنتاج وليد صبري. وكل سنة وأنتم طيبين.
أشباح أوروبا
بعد تأجيل عرضه أكتر من مرة، قررت الشركة المنتجة لفيلم "أشباح أوروبا" طرحه في موسم أفلام عيد الفطر 2022، أحداثه بتدور في إطار من الأكشن والإثارة، وبيقوم ببطولته هيفاء وهبي، أحمد الفيشاوي، ومصطفى خاطر، وباسم سمرة، وأروى جودة، وعباس أبو الحسن، من إخراج محمد حماقي.
زومبي
بتدور أحداثه في إطار كوميدي عن فرقة غناء شعبية، بقيادة علي ربيع اللي بيظهر في دور مطرب مهرجانات، وبيشاركه البطولة حمدي الميرغني وبيجسد شخصية شاعر غنائي، وبيشاركهم عدد من الفنانين منهم، كريم عفيفي، هاجر أحمد، محمد أوتاكا، عارفة عبد الرسول، محمد محمود، من تأليف أمين جمال ووليد أبو المجد، وإخراج عمرو صلاح.
فارس
أول بطولة للفنان أحمد زاهر في السبنما، بيجسد خلاله شخصية بطل شعبي بيشتغل عامل في محطة بنزين، ويدخل في صراع مع رجل أعمال صاحب سلطة ونفوذ، وبتبدأ بينهم سلسلة مطاردات ومعارك وتورط في جرائم قتل، بيشاركه البطولة الفنان حسين فهمي، صلاح عبدالله، منة فضالي، عابد عناني، دارين حداد، ملك أحمد زاهر، تأليف حسام موسي، إخراج رؤوف عبدالعزيز.
