"مارتن سكورسيزي" واحد من أشهر مخرجين هوليوود، اللي أعمالهم سابت علامة كبيرة في مجال صناعة السينما. واتميز بأفلام العصابات والمافيا، اللي كل واحد منهم يعتبر مرجع في حد ذاته. منهم على سبيل المثال لا الحصر: Casino 1995 – Goodfellas 1990 – Gangs of New York 2002.
دلوقتي كل الأنظار متجهة لفيلمه الجديد "The Irishman"، اللي خطف الانتباه من أول ما تم إعلان العمل عليه، ولحد ما طرحت نتفليكس التريلر الخاص به. بس زي أي عمل كبير، لا تخلو كواليسه من مشاكل ولحظات حاسمة ومفاجآت كبيرة. تعالوا نتعرف عليها في السطور اللي جاية:
تاريخ العرض
الفيلم هيتعرض في دور السينما 1 نوفمبر، وعلى منصة نتفليكس يوم 27 نوفمبر. لكن قبل الميعادين دول، هيتم عرض الفيلم في مهرجان نيويورك للأفلام يوم 27 سبتمبر. وفي مهرجان لندن للأفلام يوم 13 أكتوبر.
ميزانية ضخمة
تكلفة إنتاج الفيلم وصلت لـ 200 مليون دولار. ودي ميزانية ضخمة جدًا بالنسبة لأفلام الجريمة. ويمكن تكون الأضخم لحد دلوقتي.
نتفليكس كانت طوق النجاة للفيلم
الفيلم ده كان حلم لـ "سكورسيزي" من سنين. تقريبًا من 2008. لكنه قابل مشاكل كتير، وانشغل "سكورسيزي" بأعمال تانية. في 2017 وافقت شركة "باراماونت" و"فابريكا دي سين" إنهم يمولوا الفيلم. وحددوا تاريخ العرض لـ 2019.
ميزانية الفيلم اتحددت بـ 100 مليون دولار، لكن فجأة زادت لـ 200 مليون. بعد ما الإنتاج قرر الاعتماد على تقنية الـ CGI في عمل De-aging للمثلين. اللي من خلالها هيتم تغيير ملامح الممثلين، علشان يبانوا أصغر. وده كان عنصر مهم ومؤثر في الفيلم. ساعتها الشركتين قرروا التراجع عن التمويل، بسبب المبلغ الضخم.
هنا ظهرت نتفليكس، ووافقت على تمويل الفيلم حسب الميزانية المحددة. وبالتالي كانت هي طوق النجاة، اللي كان له الفضل في ظهور الفيلم للنور. عن الموقف ده قال سكورسيزي "الفيلم فيه مخاطرة، والقائمين على نتفليكس بيخاطروا. مفيش حد وافق يمول الفيلم لمدة سبع سنين. وطبعًا إحنا بنكبر في السن".
مؤلف حاصل على أوسكار
"ستيفين زيليان" مؤلف الفيلم، فاز بأوسكار أحسن مؤلف عن فيلم "Schindler’s List". واترشح للأوسكار أحسن مؤلف عن فيلم "Gangs of New York". مفيهاش كلام تاني.
أول تعاون وعودة بعد غياب
الفيلم ده أول تعاون بين "آل باتشينو" و"سكورسيزي". وكمان أول ظهور لـ "جو بيسكي"، بعد اعتزاله من ساعة فيلم "Love Ranch" سنة 2010.
كمان "سكورسيزي" ماعملش أفلام جريمة من ساعة فيلم The Departed سنة 2006.
أطول مدة عرض
مدة عرض الفيلم 3 ساعات ونص، وده يخليه أطول أفلام مارتن سكورسيزي على الإطلاق. ده لو ماحسبناش فيلم My Voyage to Italy (1999)، لأنه كان فيلم وثائقي.
المصادر:
IMDb
Screenrant
Rottentomatoes
