ساعات وهنستقبل سنة 2021، اللي اتوحدت فيها أمنيات العالم كله واتلخصت في انتهاء وباء كورونا اللعين، وبما إن الاحتفالات بالسنة الجديدة هتكون في البيت علشان نحمي نفسنا وحبايبنا، فدي فرصة جديدة للمة العيلة، ومافيش أحسن من مشاهدة الأفلام اللي بترجع ذكرياتنا الجميلة كل سنة في نفس الميعاد.

وبالمناسبة السعيدة دي، هنفكركم بـ 5 أفلام مميزة، هتعيشكم جو احتفالات الكريسماس ورأس السنة وأنتم في البيت، يالا نعرفها:

Home Alone

من سنين طويلة ارتبط فيلم "Home Alone" بليلة الكريسماس، الفيلم بيحكي عن طفل صغير أهله بينسوه في البيت بالغلط، وبيسافروا يحتفلوا بعيد الميلاد في فرنسا، فبيضطر يقضي اليوم ده لوحده وبتبدأ مغامرات ولا في الخيال.

Happy New Year

لو عايز تتفرج على كوكتيل من الألوان المبهجة والاستعراضات والرقصات الهندية اللذيذة، فيلم "Happy New year" هياخدك لعالم تاني، أحداثه بتدور في جو من الجريمة والرومانسية عن عصابة حرامية، بيشاركوا في مسابقة رقص عالمية لسنة 2014، علشان يسرقوا مجوهرات ثمينة، وعلشان هدفهم ماكنش الفوز، بتتطور بيهم المواقف بشكل كوميدي مخطرش على بالهم.

Christmas Inheritance

"إلين" فتاة وحيدة مدللة، والدها عنده شركة هدايا وألعاب كبيرة، وعلشان تورث الشركة دي، لازم تزور بلد صغيرة بعيدة وهي مسقط رأسه في الأساس، بيعيش فيها صديق قديم لوالدها، ومهمتها توصل له جوابات الكريسماس، وهناك هتتعلم قيمة العمل الجاد ومساعدة الآخرين، وبتحصل لها مفاجأة بتقلب حياتها كلها، يا ترى إيه هي؟.

The Holiday

لعشاق قصص الحب والرومانسية، فيلم "The Holiday" في انتظاركم، الفيلم بيدور عن قصص حب متبادلة، بتبدأ لما بتقرر امرأتين تبادل أماكن سكنهم الحالية، وبتعيش كل واحدة من في بيت الثانية، وهنا بتقابلهم اختلافات كتير في المستوى المادي والاجتماعي، علشان يقابلوا الأشخاص المناسبين لهم في مكان مختلف، ياترى هينجحوا ولا لا؟

Christmas Carol

الفيلم مأخوذ عن رواية "ترنيمة عيد الميلاد" لتشارلز ديكنز، وبينتمي لنوعية الأفلام الأنيميشن، بيحكي قصة رجل عجوز بخيل جدًا وقاسي القلب على المحيطين به، بيخوض رحلة مليانة بالعجائب والغرائب مع أشباح أعياد الميلاد، اللي بيحاولوا يدخلوا العطف لقلبه ويغيروه للأفضل، وكمان بتحذره من مصيره لو استمر بنفس طريقة حياته.

سنة سعيدة عليكم