من ساعات انطلقت فعاليات مهرجان القاهرة السينمائي الدولي 2020، في دورة إستثنائية سواء على مستوى عدد النجوم الحاضرين أو الأفلام المشاركة.
وعلشان ماتحتاروش كتير قدام الأفلام اللي هتُعرض السنة دي، إحنا هنرشحلكم 10 أفلام تستحق المشاهدة، هتلاقوها ضمن جدول أفلام المهرجان، وطبعًا ماتنسوش تلتزموا بإرشادات الوقاية اللي هتحميكم من الإصابة بفيروس "كورونا" المستجد.
Undine
قصة حب بتنتقل من شوارع برلين لبحيرات براندينبورج، حاجه كده قريبة من أسطورة عروسة البحر، الفيلم من بطولة اثنين من أفضل ممثلين القارة العجوز، باولا بير وفرانز روجوفسكي.
Nomadland
حكاية إمرأة خسرت كل اللي بتملكه في الأزمة الاقتصادية العالمية، فبتقرر تخرج للطبيعة وتخوض تجربة الترحال، علشان تتواصل أكتر مع نفسها، كل ده من خلال عربية عايشة جواها بتنقلها من ولاية أمريكية للتانية، بطولة فرانسيس ماكدورماند.
There is No Evil
حكايات منفصلة متصلة عن عقوبة الإعدام، الفيلم واجه مطالبات بمنع عرضه، وتم اتهامه بتشويه سمعة الجمهورية الإسلامية، لإنه بيوثق لحظات إنسانية قاسية بيعيشها المواطن الإيراني، قام بإخراجه محمد رسولوف.
Gaza mon amour
فيلم رومانسي ساخر عن الأوضاع السياسية اللي بتعيشها غزة تحت الاحتلال، هتشوفوا فيه قصة حب بتحصل في بلد بتعاني من الحرب.
The Father
فيلم افتتاح المهرجان، بتدور أحداثه حول أب مسن، بيرفض الاعتراف بتقدمه في العمر، وبيرفض مساعدات بنته، وبيفقد الثقة في الأشخاص والعالم حواليه.
عاش يا كابتن
فيلم تسجيلي مصري، بيرصد حياة فتاة سكندرية بترفع أثقال، بتحاول توصل للحلم الأوليمبي بإمكانيات محدودة جدًا.
Servants
المرة دي هتتفرج على فيلم أبيض وأسود، الفيلم فلسفي شويتين، وأبطاله بيعيشوا حياة مش مريحة في دولة شمولية بتعد عليهم أنفاسهم، وبيدأوا يسألوا نفسهم أسئلة وجودية.
"The Disciple- التلميذ"
بتدور أحداثه حول شاب هندي يكرس حياته لتحقيق حلمه بالغناء الهندى الكلاسيكى، من خلال سرد بصري تأملي، ولحظات بترسم صورة عن علاقة ساحرية بين البشر وعالم الميتافيزيقا
The Best Is Yet to Come
فيلم صيني يبحث عن الحقيقة وراء فضيحة طبية بتأثر على حياة 100 مليون إنسان، مش وباء "كورونا"، لكن الالتهاب الكبدي الوبائي.
حظر تجول
أحداثه بتدور في ليلة من ليالي خريف سنة 2013 خلال فترة حظر التجول في مصر، حول "فاتن" اللي خرجت من السجن بعد 20 سنة، بسبب ارتكابها جريمة بشعة، والحظر اللي أجبرها تقضي ليلة عند ليلى، واللي بتطرح عليها أسلئة مسكوت عنها، وكأنها في محكمة وبتمر بيهم الليلة وكل واحد منهم بتحول تتقبل التانية، الفيلم بطولة إلهام شاهين، أمينة خليل، أحمد مجدي، ومحمود الليثي.
