هوليوود مليانة مخرجين ممتازين، بس دايمًا وسطهم بتلمع أسماء معينة، بفضل أفلامهم اللي بتسيب بصمة قوية. وواحد من ضمن الأسماء دي هو "كوينتن تارانتينو". غير إن أفلامه مبهرة بشكل كبير، كمان بتتميز بحاجات معينة، تخليك تعرفها من وسط مليون فيلم. تعالوا نتعرف عليها:

دم كتير

اللي يعرف "تارانتينو" أكيد عارف كمية الدم اللي بتغرق الشاشة في أفلامه. كمية قتل غير طبيعية، ومعاها كمية ده تكفي بلد بحالها.

 

Chapters

أغلب أفلام "تارانتينو" بتكون متقسمة لـ chapters أو فصول. وكل فصل بيكون بعنوان خاص. حاجة كده تشبه القصص والروايات. أو كأنك بتشوف مسرحية مثلًا.

مزيكا حماسية

من أحلى الحاجات اللي بتميز أفلام "تارانتينو" هي المزيكا الحماسية، اللي بتتلعب مع المشاهد. حتى لو مشهد بسيط لمجموعة من أبطال الفيلم ماشيين على الطريق مثلًا. المزيكا دايمًا بتكون قوية ومميزة.

 

أي بطل ممكن يموت

على طريقة Game of Thrones، "تارانتينو" ماعندوش كبير. ممكن أي بطل أساسي في الفيلم يموت في أي لحظة. فبلاش ترتبط بأي شخصية، علشان ماتزعلش.

 

تفاصيل التفاصيل

بيهتم بالتفاصيل بشكل كبير جدًا. حتى لو تفصيلة مش هتفرق في أي أحداث جاية في الفيلم. سواء تفاصيل حاجة بتتعمل على الشاشة، أو حوار بين الشخصيات. والغريب إن مفيهاش ملل على الإطلاق.