بعد الظهور المتميز اللي حققه الفنان شريف دسوقي في مسلسل بـ "100 وش"، ناس كتير توقعت إن العروض الفنية هتنهال على عم "سبعبع"، وهنبدأ نقرأ أخبار كتيرة عن أعماله الفنية في مجال السينما والتلفزيون.. لكن اللي حصل هو إن أخباره أصبحت فقط منحصرة في عالم الأزمات التي بتسبب جدل كبير على السوشيال ميديا، أخرها كان الخبر المؤلم اللي انتشر في الساعات الأخيرة.. وهو خضوعه لعملية جراحية أدت لـ بتر قدمه، على خلفية إصابته بمرض السكري.

الأزمة الصحية الأخيرة والمؤلمة ماكنتش هي الحاجة الصعبة الوحيدة اللي مر بيها الفنان شريف دسوقي، اللي من فترة ظهر في مقطع فيديو على مواقع التواصل الاجتماعي، في مكان متواضع، ومصاب في رجله، وكان بيردد كلام وصفه البعض إنه غير مفهوم، لكنه وجه رسالة للدكتور أشرف زكي نقيب الممثلين وقاله: "ماتبعنيش لحد".

وهنا كان بيقصد إنه عايز تعويض مادي، نتيجة تعرضه لإصابة خطيرة في قدمه خلال تصوير فيلم "وقفة رجالة"، الأمر اللي أدى للاستغناء عنه، ووقتها أعلن كمان إنه هيعتزل الفن خالص لحد سنة 2025، مش بس كده ده هدد كمان بالانتحار لو ماخدش الفلوس.

كمان دخل شريف دسوقي في مشكلة مع شركة العدل جروب، وطالبهم بدفع الضرائب عنه في مسلسل بـ "100 وش"، وخلال اجتماعه مع أحد ممثلي الشركة والنقيب أشرف زكي في نقابة المهن التمثيلية، هدد بالانتحار، وهنا اتدخل النقيب وطلب مقابلة حد من أهل الفنان لتهدئة الأمور، وقيل وقتها إنه تم وضعه في مصحة نفسية لحد ما يرجع لحالته الطبيعية مرة تانية.

إحنا في كلام القاهرة بنتمنى للفنان شريف دسوقي الشفاء والسلامة..