من أول طلة له على الشاشة سواء في "البرنس" أو "بـ 100 وش"، فكرنا بالفنان العالمي عمر الشريف. نفس عيونه الملونة ونظرته الحادة، نفس الشكل والملامح. لدرجة إن كتير من المشاهدين خمنوا إنه فعلًا حفيد عمر الشريف. لكن الحقيقة غير كده خالص. تعالوا نتعرف على أحمد حسنين، اللي كل السوشيال ميديا بتتكلم عليه اليومين دول:

1- عمره 30 سنة. خريج كلية إدارة الأعمال من أحد الجامعات الخاصة، واشتغل فترة فى مجال التسويق العقاري.

2- بدأ مشواره الفني من 3 سنين فى مسلسل "لا تطفىء الشمس"، بعدها شارك في الجزء الرابع من مسلسل "حكايات بنات".

3- تعتبر 2020 هي انطلاقته الحقيقية في عالم الفن. لأنه اتعرف من خلال مشاركته في مسلسل "البرنس"، مع النجم محمد رمضان. و مسلسل " بـ 100 وش"، مع النجوم آسر ياسين ونيللي كريم.

4- كان بيعشق التمثيل من صغره، وظهر كموديل في الإعلانات. واشترك في أكتر من ورشة تمثيل علشان ينمي موهبته.

5- نفى أحمد حسنين وجود أي صلة قرابة بتجمعه بالراحل عمر الشريف. لكن أكد على سعادته بالشبه بينهم، وبيعتبر ده شرف كبير له.

6- بيشارك كمان السنة دي في مسلسل "ليه لأ" بطولة أمينة خليل. اللي من كان من المقرر عرضه في نص رمضان لكن تم تأجيله.

7- بيتمنى العمل مع كل المخرجين، ويقدم أدوار مختلفة لها أبعاد عميقة غير الأدوار الرومانسية. ونفسه يمثل مع الفنان الكبير يحيى الفخراني وكريم عبد العزيز ومنه شلبي.