وصلنا لنصف رمضان، وكل واحد فينا متابع مسلسلات بعينها، وشايفين كمان مسلسلات معينة متصدرة السوشيال ميديا سواء بالكوميكس أو الكتابات عنها بعد كل حلقة، ووسط  زحمة الأعمال دي، فيه كام مسلسل كده مش واخدين حقهم مع إنهم بيناقشوا موضوعات إنسانية مهمة ومناسبين جدًا لشهر رمضان وبيفكرونا بأعمال زمان.

1- نجيب زاهي زركش

بيشهد عودة النجم الكبير يحيى الفخراني للدراما الرمضانية، وزي ما عودنا على السهل الممتنع، بنشوف معاه علاقة الأب بأولاده بطريقة واقعية لنماذج في حياتنا اليومية، يعني وجبة درامية اجتماعية تتفرج عليها مع أسرتك وانت مش قلقان من المشهد اللي جاي.

2- ولاد ناس

مسلسل بطولة رانيا فريد شوقي وماجد الكدواني ونجوم أكتر، قصته بتناقش بشكل إنساني مشاكل التعليم الدولي في مصر وعلاقة الأهالي بالأبناء، وبالتأكيد علاقتك بأولادك هتختلف تمامًا بعد متابعتك للمسلسل ده.

3-   المداح

لو أنت من عشاق الصوفية والمدح والإنشاد الديني، يبقى "المداح" مسلسلك السنة دي، قصته درامية اجتماعية، بيناقش قضية ناس كتير بتقع فيها، وبيتم النصب عليهم من خلالها، وهي السحر والشعوذ.

4- خلي بالك من زيزي

رغم إنه مابيعتمدش على نجوم الكوميديا، بس بنشوف فيه كوميديا المواقف، بعيد عن المبالغة أو الإيحاءات اللي مش لطيفة، حاجه كده بتفكرنا بفيلم "مراتي مدير عام" لشادية وصلاح ذو الفقار. ومن ناحية تانية المسلسل بيناقش قضية مهمة جدًا وهي مرض فرط الحركة.

نتمنى لكم مشاهدة ممتعة!