إمبارح، 12 مايو، ودعنا الفنان إبراهيم نصر عن عمر 70 سنة. واللي لحد النهارده مازال متربع على عرش برامج المقالب. الفنان اللي نقدر نقول إنه وهب حياته لرسم الضحكة على وشوشنا، سواء في السينما أو الدراما أو برامج المقالب.

تعالوا نشوف أهم محطات في حياته:

1- بدأ مشواره الفني كمونولوجيست بيقلد الفنانين، وبعدها شارك في برامج الأطفال. لحد ما قابل الراحل فؤاد المهندس واتعاون معاه في فوازير "عمو فؤاد".

2- حقق شهرة كبيرة ونجح في كتير من الأعمال التلفزيونية والسينمائية، زي: شمس الزناتي - امرأة واحدة لا تكفي - حسن اللول - إكس لارج - فوق السحاب، وغيرهم.

3- على مدار 20 سنة قدم مقالب الكاميرا الخفية، اللي كانت سبب تعلق الجمهور به. بعدها قرر يوقف البرنامج علشان يشوف إيه الجديد اللي ممكن يقدمه.

4- تعاونه مع الفنان أحمد زكي هو الأبرز في مسيرته. ومن المواقف اللي حكاها كان خلال تصوير في فيلم "امرأة واحدة لا تكفي"، لما هم الاتنين اتفقوا يضربوا بعض بجد في قفص الأسود، لحد ما اتصابوا. بعدها ضحكوا على اللي عملوه في بعض.

5- وعن مسيرته الفنية  قال إبرهيم نصر إنه بيحب كل اللي عمله. وإنه مايقدرش يعمل أي حاجة إلا إذا كان بيحبها.

6- من مفارقات القدر الجميلة إنه رحل في شهر رمضان. أكتر شهر كان وش الخير عليه وحبيناه فيه واتعرف منه. وكأنه عايزنا نفضل فاكرينه كل رمضان.

هوحشنا ياعم إبراهيم. وهنفضل فاكرينك.