الفنانة هند صبري مشغولة حاليًا بتصوير مشاهدها في مسلسل "البحث عن علا"، واللي بتقدم من خلاله شخصية "علا عبد الصبور"، اللي حققت نجاح جماهيري كبير في مسلسل "عايزة اتجوز" اللي شوفناه في 2010، وبالمناسبة دي تعالوا نعرف تفاصيل المسلسل الجديد من خلال 5 معلومات فيهم الخلاصة:

1- المسلسل مش جزء ثاني لـ "عايزة اتجوز"، رغم أنه بيحكي مراحل في حياة الدكتورة الصيدلانية "علا"، والمغامرات الجديدة اللي بتمر بيها، وكمان محاولاتها لاكتشاف لنفسها، ومحاولاتها إنها تلاقي حب حقيقي في حياتها.

2- بيشارك في بطولة المسلسل عدد من النجوم منهم: سوسن بدر، هاني عادل، ندى موسى، محمود الليثي، وداليا شوقي. بجانب ضيوف الشرف من مصر والعالم العربي، وعلى رأسهم الفنان القدير خالد النبوي.

3- تم تصوير أحداث المسلسل في أواخر شهر يناير اللي فات، وده في أكثر من مكان واستديو بالقاهرة، مع الحفاظ على معايير السلامة وتطبيق الإجراءات الاحترازية لضمان صحة فريق العمل.

4- المسلسل هيتعرض على شبكة "نتفليكس" الإلكترونية، خلال الفترة الجاية لكن لسه ماتحدددش ميعاد عرضه بالظبط.

5- قام بتأليف تفاصيل شخصيات العمل الكاتبة غادة عبدالعال، والقصة والسيناريو والحوار مها الوزير بالاشتراك مع غادة عبدالعال، ومن إخراج هادي الباجوري.