دراما رمضان السنة دي، كانت مليانة بقصص خيانة وغدر وخذلان، ووسط كل النماذج دي، قدرت الفنانة "سينتيا خليفة" تحجز مكانها على الشاشة، وكأنها بتعلن عن بداية جديدة لمشوارها الفني رغم بدايته من حوالي 10 سنين في لبنان، شوفنا جبروت الزوجة الخاينة ومرات الأب "نادين" قدام النجمة يسرا في مسلسل "حرب أهلية"، وكمان خطافة الرجالة "مايا" مع نيللى كريم في "ضد الكسر"، والحقيقة لعبت الشخصيتين باحترافية كبيرة.

وفي حوارها مع "كلام القاهرة" قالت "سينتيا" إن رغم تشابه الدورين اللي قدمتهم السنة دي كشخصيات شريرة في الأساس، إلا أنهم مختلفين في الشكل والمشاعر والقصة، ولما اتعرض عليها المشاركة وافقت فورًا لإنهم مع نجوم كبار، وبدأت رحلتها في إضافة تفاصيل على الشخصيات علشان مايطلعوش شبه بعض.

وعن الخيانة اللي برعت في تقديمها، قالت: "ممكن أكون اتعرضت لها في حياتي الشخصية، وأوقات كمان بتجيلنا من الصحاب أو من ناس بنثق فيهم على مستوى الشغل وحتى كمان العيلة".

أما عن ردود فعل بعض الناس الرافضة لنوعية الأدوار دي، وضحت إنها مش خايفة خالص لإنها في الآخر ممثلة وبتتحول لشخصية تانية مختلفة عن شخصيتها الحقيقية، وهي مجرد بتلبس ماسك وبتشتغل عليه، وقالت كمان إن الأمر ده بيضحكها.

وكشفت لنا إنها معروفة في لبنان بممثلة الأدوار الطيبة، ولكنها بتحب التغيير علشان كده تحمست جدًا لما اتعرضت عليها أعمال مختلفة السنة دي واعتبرتها تحدي ليها، وماكانتش متوقعة النجاح ده.

"سينتيا" استعانت بـ أستاذ لهجة علشان تظهر وكأنها مصرية زي ما شوفناها كده، وقفلت على نفسها فترة طويلة وكانت بتصحى وتنام على تسجيلات باللهجة المصرية.

وأشارت لإنها بتتوقع إن موسم دراما رمضان الجاي هيكون كوميدي أكتر، وأضافت إنها نفسها تقدم أدوار فيها كوميديا أو غناء أو دور فتاة مريض نفسية، أما عن الدور اللي مستحيل تقدمه فكان الأدوار المثيرة جدًا واللي فيها مشاهد خاصة وقالت: "ماعتقدش إني هقدر أعملها".

وعن سر جمالها ورشاقها طول الوقت، قالت لنا إنها بتاكل فاكهة وبتشرب عصاير طبيعية ومياه كتير، كمان بتنام كويس وبتهتم بوضع الزيوت والكريمات لوشها وشعرها، وأهم حاجة من وجها نظرها السعادة لإنها أكتر حاجة بتضر الشكل الخارجي.

من ناحية تانية، بتشارك سينتيا خليفة في فيلم "بيمبو" بطولة أحمد مالك، هدى المفتي، ويجز، وإخراج المخرج عمرو سلامة، ومن المقرر عرضه على منصة "شاهد"، كمان هنشوفها مع الفنانة ياسمين رئيس في عملها القادم، ده غير إنها هترجع للدراما اللبنانية قريب في دور جديد.