إمبارح طرح الهضبة عمرو دياب ألبومه الجديد "سهران"، اللي الديابوية مستنيينه بفارغ الصبر. بعد ما فضل مشوقنا طول الأيام اللي فات، بسمابلز من أغاني الألبوم. وعلشان فرحة المناسبة دي عند جمهوره، زي فرحة ليلة العيد، قولنا نرجع بالزمن كام سنة لورا. ونفتكر مع بعض الفرق بين زمان ودلوقتي، في ليلة نزول الألبوم:

البوسترات x صور السوشيال ميديا

طول فترة الثمانينات والتسعينات، ولحد أوائل الألفينات تقريبًا، بوسترات الهضبة كانت بتغرق الشوارع. وكان ليها بهجة كده وفرحه لما بتقع عينك عليها، والكل كان بيستناها علشان يشوف اللوك الجديد اللهضبة اللي مابيكبرش. لكن دلوقتي بقت بتنزل صورة بس على السوشيال ميديا. 

شريط كاسيت x إنترنت

كنا بنسمع الألبوم على شريط كاسيت. الأكشاك والمكتبات كان الإقبال عليها بيكون تاريخي الليلة دي. وفيه اللي كان بيدفع عربون علشان يحجز شريط الهضبة قبل ما يوصل الكشك. دلوقتي بقينا نسمع الألبوم كله على الإنترنت.

مش عارفين الأغاني x عارفينها قبل ماتنزل

زمان مكناش بنعرف أغاني الألبوم إيه ولا عددها كام، كنا بنعرف الأسامي لما نجيب الشريط، ونسمع الأغاني واحدة ورا التانية. لكن دلوقتي في أغاني بتنزل قبل الألبوم، ده غير السامبلز. فالألبوم بينزل وإحنا عارفين معظم أغانيه.

إعلانات تليفزيون x سوشيال ميديا

زمان كان الهضبة بيعلن عن الألبوم، بأغنية منه في إعلان على التليفزيون. ماحدش ينسى إعلان بيبسي بأغنية "أكتر واحد بيحبك". دلوقتي الإعلان بيبقى سوشيال ميديا وسامبلز، أو ممكن يقدم أغنية من الألبوم في حفلة من الحفلات.

الألبوم في صيف x أي وقت في السنة

زمان كان صيف يعني أجازة وبحر وشريط عمرو دياب. كان هو التوقيت الوحيدة لنزول الألبوم. دلوقتي الموضوع اختلف، وممكن الألبوم ينزل في أي وقت. أدينا أهو في فبراير والدنيا برد، وبنستقبل ألبوم "سهران".

وأخيرًا هنسمع ألبوم الهضبة .. لقد هرمنا