قررت إدارة مهرجان القاهرة السينمائي الدولي، برئاسة الفنان حسين فهمي، منح المخرجة كاملة أبو ذكري، جائزة فاتن حمامة للتميز، خلال فعاليات دورته الـ 44، المقرر إقامتها في الفترة من 13 لحد 22 نوفمبر الجاي.

الجائزة هتكون تقديرًا للأعمال الفنية اللي قدمتها "كاملة" طول مسيرتها اللي بدأت من التسعينيات ومستمرة لحد النهارده.

وفي بيان صحفي قال حسين فهمي عن كاملة: "مخرجة موهوبة لها بصمة مميزة في كل عمل أخرجته وأشرفت على صناعته، علشان كده كان لازم تكريمها من مهرجان بيُقدر الفن وبيدعم صناعه، مش بس في مصر لكن في العالم كله".

وفي نفس السياق، كشف المخرج أمير رمسيس، مدير المهرجان، أن الدورة الجاية هتشهد احتفال بأهم الأعمال السينمائية لكاملة أبو ذكري، وإنه حاليًا بيتم التحضيرات الخاصة بالتكريم، وهيتم الإعلان عنها خلال الأسابيع الجاية.

وعن خبر تكريمها، عبرت "كاملة" عن سعادتها الكبيرة، وقالت إنه منحها دفعة كبيرة لتقديم أفضل ماعندها للجمهور، خاصة وأن الجائزة بتحمل اسم سيدة الشاشة العربية، وكمان وجهت الشكر لإدارة المهرجان اللي اختارتها ضمن المكرمين في الدورة القادمة.

من أهم أعمال المخرجة كاملة أبو ذكري في السينما: "سنة أولى نصب، ملك وكتابة، عن العشق والهوى، واحد صفر، 18 يوم، يوم للستات"، وفي التليفزيون مسلسل "ذات، سجن النسا، واحة الغروب، 100 وش".