نشر مطرب المهرجانات حسن شاكوش "بوست" بيعتذر فيه لأصحاب أغنية "حاجة مستخبية"، واللي غناها محمد حماقي ولحنها الملحن مدين سنة 2012.

وقال "شاكوش" على صفحته الرسمية على فيسبوك: "أنا طالع علشان أعتذر وأتأسف لأخويا وصديقي الملحن العبقري مدين. أنا كنت فاهم غلط واتضحلي الحقيقة. إن لحن أغنية حاجة مستخبية اللي من إبداعه فعلًا مش زي ما أنا كنت معتقد".

وأضاف: "علشان كدة كان لازم أطلع وأدي الحقوق لأصحابها. واعتذر عن اللي صدر مني. شكرًا ليكم وأتمني محدش يزعل مني. سواء الأستاذ محمد عاطف الشاعر الكبير أو الموزع الكبير أحمد إبراهيم أو الفنان الكبير محمد حماقي".

وكان حصل مشاكل بين حسن شاكوش وصناع أغنية "حاجة مستخبية"، بعد طرحه مهرجان "بنت الجيران"، واللي لحنه يشبه جدًا لحن "حاجة مستخبية"، واعتبر صناعها إنه تعدي على حقوق الملكية الخاصة بالأغنية الأصلية، وقامت إدارة موقع "يوتيوب" بحذف المهرجان، بعد ما حقق أكثر من 600 مليون مشاهدة.

مش بس كده، الأزمة اشتعلت أكتر، بعد تصريحات "شاكوش" مع الإعلامي عمرو أديب، لما قال إن لحن أغنية "حاجة مستخبية" مسرق من لحن أغنية تركي. وقتها قرر مدين اتخاذ إجراءات قانونية ضد شاكوش، لكنه تراجع عن الخطوة دي بسبب تدخل حماقي للصلح بينهم.