مؤخرًا، أعلن الإعلامي محمد الباز في برنامجه "آخر النهار"، إن "الزعيم" عادل إمام مش هيرجع للتمثيل تاني، لأن حالته الصحية ماتسمحش بكده.
وأكد "الباز" إن الفنان عادل إمام بيعاني من أعراض ألزهايمر، ومبقاش ينفع يقف قدام الكاميرا تاني، وإن المعلومات دي وصلها من أشخاص قريبين من "الزعيم"، كانوا معاه من 4 شهور.
طبعًا الكلام ده قلب السوشيال ميديا، وسبب صدمه لجمهوره وعائلته، فخرج المنتج عصام إمام شقيقه، وعبر عن استغرابه من تكرار الشائعات حول صحة الزعيم، وقال: "أنا مش عارف الناس دي مستعجلة على إيه، إيه سبب أن يتقال كده، ده عادل إمام لو فيه حاجة ولو في مستشفى العالم كله هيعرف".
مش بس كده، كشف كمان إن عادل إمام قاله "بترد ليه عليهم؟ دول موتوني قبل كده خمس أو ست مرات هيقولوا إيه تاني؟".
كمان نشر عُمر متولي، ابن شقيقة عادل إمام، إمبارح، صورة حديثة جمعته بخاله، وعلق عليها: "ربنا يخليك لينا".
أخر أعمال الفنان عادل إمام كان مسلسل "فلانتينو"، واتعرض في موسم درما رمضان 2020، ومن فترة أكد ابنه المخرج رامي إمام على عودته بـ فيلم اسمه "الواد وأبوه"، هيجمعه بابنه محمد وهيكون من إخراجه.
بنتمنى لزعيم الكوميديا الصحة والسلامة دايمًا.